د ایران سفیر: ایران له افغانستان سره سوداګریزې او اقتصادي اړیکې پراخوي
په افغانستان کې د ایران سفیر، عليرضا بیکدلي ویلي چې تهران غواړي له کابل سره خپلې سوداګریزې او اقتصادي اړیکې پراخې او پیاوړې کړي.
په افغانستان کې د ایران سفیر، عليرضا بیکدلي ویلي چې تهران غواړي له کابل سره خپلې سوداګریزې او اقتصادي اړیکې پراخې او پیاوړې کړي.
بیکدلي چې په کابل کې یې د طالبانو د صنعت او کانونو د پنځم نړیوال نندارتون پر مهال خبرې کولې، ویلي، چې د دواړو هېوادونو ترمنځ د ترانزیټي لارو په پراخېدو سره اقتصادي همکارۍ هم زیاتې شوې دي.
بیکدلي زیاته کړې، چې ایراني شرکتونو په دې نندارتون کې له ګډون هرکلی کړی او خپل صنعتي او ودانیز محصولات یې نندارې ته وړاندې کړي دي.
په افغانستان کې د ایران سفیر ټینګار کړی چې ایران له افغانستان سره د اقتصادي همکاریو دوام ته ژمن دی او دا بهیر به دوام ولري.
د طالبانو د صنعت او کانونو پنځم نړیوال نندارتون په کابل کې د دولتي ادارو او خصوصي سکټور په ګډون جوړ شوی، چې د افغانستان او یو شمېر نورو هېوادونو لسګونه شرکتونه پکې برخه لري.
