باخبره سرچینو افغانستان انټرنشنل ته ویلي، طالبانو د پنجشنبې په ورځ د هرات ښار له درېیو بېلابېلو سیمو څخه لږ تر لږه ۱۲ ښځې او یو نارینه نیولي دي. د عیني شاهدانو په وینا، ښايي د نیول شویو ښځو شمېر تر دې هم زیات وي.
د عیني شاهدانو د معلوماتو لهمخې، د پنجشنبې په مازیګر (د چنګاښ ۱۱مه) طالبانو د هرات ښار د بکراباد سیمې له یوه ستر خوراکي پلورنځي څخه لږ تر لږه دوه ځوانې نجونې ونیولې.
بکراباد د هرات ښار په سوېل کې هغه سیمه ده، چې ډېری اوسېدونکي یې شیعه مذهبه دي.
یوه بل عیني شاهد ویلي، طالبانو د هرات ښار په شمال کې د امام فخر رازي څلور لارې کې هم یوه ځوانه نجلۍ نیولې ده.
د سرچینې په وینا، دغې نجلۍ د طالبانو له غوښتنې سره سم پوښښ نهدرلود، نو پنځو طالب وسلهوالو هغه ونیوله.
سرچینې زیاته کړه، نجلۍ په یوه درېویلر موټر کې سپره وه او طالبانو د دغه موټر چلوونکی هم د هغې د لېږدولو په تړاو نیولی او له ځان سره یې وړی دی.
په ورته وخت کې یوې بلې سرچینې افغانستان انټرنشنل ته ویلي، طالبانو د پنجشنبې په ورځ د هرات ښار د ۶۴ متره سړک په اوږدو کې ۹ نورې ځوانې ښځې هم نیولې دي.
طالبانو په تېره یوه میاشت کې په هرات کې څو ځله د حجاب د څرنګوالي په تړاو یو شمېر ښځې نیولې دي. دغه ډله وايي، ښځې باید «مانتو» وانه غوندي.
یو شمېر افغانانو د نړۍ په ۳۰ هېوادونو کې د هرات د ښځو د نیولو پر ضد اعتراضي غونډې وکړې او هراتۍ ښځو ته یې د پوښښ لپاره د حق ورکړې غوښتنه درلوده.
په خپله هرات کې هم د طالبانو د دغو کړنو پر ضد لږ تر لږه دوه اعتراضي غونډې وشوې، خو طالبانو هغه وځپلې.
د هرات ښار د جبرییل سیمې په یوه اعتراض کې دوه کسان وژل شوي هم وو.
طالبانو لا تراوسه د یادو ښځو د نیول کېدو په تړاو څه سپیناوی نهدی کړی.
