د افغانستان د ووشو ملي لوبغاړي شهزاده صافی او محمد خالد هوتک د چین په کوربهتوب د ووشو شانګهای سازمان په اسیايي سیالیو کې د سپینو زرو او برنزو مډالونو له ګټلو وروسته هېواد ته راستانه شول.
د طالبانو تر کنټرول لاندې د المپیک، بدني روزنې او سپورټ ادارې عمومي رییس احمدالله وثیق د پنجشنبې په ورځ (د چنګاښ ۱۱مه) په خپله ایکسپاڼه لیکلي، چې هېواد ته د دغو لوبغاړو له راتګ څخه تود هرکلی شوی دی.
په دې سیالیو کې افغان لوبغاړي شهزاده صافي په ۵۶ کیلو ګرامه وزن کې له قزاقستان او هانکانګ څخه خپلو سیالانو ته په ماتې ورکولو سره د سپینو زرو مډال وګاټه، په داسې حال کې چې محمد خالد هوتک د ۷۰ کیلو ګرامه وزن په برخه کې د برنزو مډال ترلاسه کړی دی.
یادې سیالۍ د چین په کوربهتوب د ۱۸ هېوادونو د ورزشکارانو په ګډون ترسره شوي، چې د افغانستان په استازیتوب پهکې شپږو لوبغاړو برخه اخیستې وه.
د سپورټ ادارې مسوولینو د افغان ورزشکارانو دا لاسته راوړنه ستایلې او دا یې د هېواد د ووشو د پرمختګ لپاره مهم ګام بللی دی.
