د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د جمعې په ورځ له بېلابېلو لارو ۱۹۰۱ کډوال افغانستان ته ستانه شوي دي. د یاد کمېسیون د راپور لهمخې، له راستنو شویو کورنیو سره په بېلابېلو برخو کې مرستې هم شوې دي.
د طالبانو د یاد کمېسیون د راپور لهمخې، د جمعې په ورځ له پاکستان او ایران نه ۳۷۷ کورنۍ چې د غړو شمېر یې ۱۹۰۱ کسانو ته رسېږي، افغانستان ته ستنې شوې دي. په راپور کې راغلي، چې له دې ډلې د ننګرهار د تورخم له لارې ۳۰۴ کورنۍ، د کندهار د سپین بولدک له لارې ۱۵ کورنۍ، د هلمند د بهرامچې له لارې ۲ کورنۍ او د هرات د اسلام کلا له لارې ۱۶ کورنۍ ثبت او بېرته هېواد ته ستنې شوې دي.
د طالبانو د راپور لهمخې، په همدې ورځ ۲۸۹ کورنۍ چې د غړو شمېر یې ۱۵۰۴ ته رسیږي، خپلو مېنو ته لېږدول شوې دي.
