سرچینې: د کابل پوهنتون په چاودنه کې شاوخوا ۲۰ زده کړیالان ټپیان شوي
له کابل څخه یوې باوري سرچینې شنبې ( د چنګاښ۱۳مه) افغانستان انټرنشنل ته ویلي، چې د کابل پوهنتون پر لیلې د تیرې شپې چاودنه کې شاوخوا ۲۰ زده کړیالان ټپیان شوي دي.
له کابل څخه یوې باوري سرچینې شنبې ( د چنګاښ۱۳مه) افغانستان انټرنشنل ته ویلي، چې د کابل پوهنتون پر لیلې د تیرې شپې چاودنه کې شاوخوا ۲۰ زده کړیالان ټپیان شوي دي.
د سرچینې په وینا، دغه چاودنه کې څوک مړه شوي ندي خو ټپیان د درملنې لپاره د علياباد روغتون ته لېږدول شوي او روغتیايي وضعیت یې د ډاډ وړ بللی.
دا په داسې حال کې ده چې تېره شپه له کابل څخه عیني شاهدانو افغانستان انټرنشنل- پښتو ته ویلي و، چې د جمعې په شپه شاوخوا اته بجې د کابل پوهنتون په لیليه کې چاودنه شوې ده. سرچینو د دغې چاودنې ډول لاسي بم ښودلی و.
سرچینې ویلي وو چې له چاودنې وروسته طالبانو له زده کړیالانو په کلکه غوښتي وو چې د باندې ونه لیدل شي.
همداراز هغو ویډیوګانو کې چې له پېښې لږ وروسته خپرې شوې وې، د پوهنتون د لیلیې شاوخوا یې څو امبولانسونه ښودل چې ټپیان یې لېږدول.
طالبانو تر اوسه د یادې چاودنې په اړه څه ندي ویلي.
