د کنړ ولایت یو شمېر اوسېدونکي او د ښوونکو د ګومارنې ازموینې ګډونوال شکایت کوي، چې د پوهنې ریاست له لوري د ښوونکو د ګومارنې په بهیر کې شفافیت نه دی رعایت شوی او د ازموینې د پایلو د بدلون هڅې روانې دي.
شکایت کوونکو افغانستان انټرنشنل - پښتو ته ویلي، شاوخوا شل ورځې وړاندې د کنړ د پوهنې ریاست د ۳۶ ښوونیزو بستونو لپاره ازموینه واخیسته. د دوی په وینا، د ازموینې پر مهال د پوهنې ریاست مسوولینو ژمنه کړې وه چې د ګومارنې بهیر به په بشپړ ډول شفاف وي او حق به مستحق ته سپارل کېږي.
د دوی په خبره، د ازموینې د پایلو له اعلان وروسته د درېپیچ ولسوالۍ د دوو بستونو لپاره بریالي نوماندان معلوم شول، خو اوس د پوهنې ریاست غواړي دغه دوه بستونه بېرته اعلان ته وسپاري.
شکایت کوونکي ادعا کوي چې د کنړ د پوهنې ریاست یوازې د ۳۴ بریالیو نوماندان وزارت ته د منظورۍ لپاره ورپېژندلي او د درېپیچ ولسوالۍ دوه بستونه یې ځکه ځنډولي چې د چارواکو په خوښه کسان پکې بریالي شوي نه دي.
دوی وایي، د دغو دوو بستونو لپاره له بریالیو نوماندانو سربېره لسګونه نور کسان هم د احتیاطي نوملړ (ریزرف) په توګه موجود دي، خو بیا هم د بستونو د بیا اعلان پرېکړه د شفافیت او عدالت خلاف بولي.
شکایت کوونکي له طالبانو د پوهنې وزارت او اړوندو څارونکو بنسټونو غواړي چې د ګومارنې د دې بهیر په اړه بېطرفه څېړنه وکړي او د ازموینې پایلې د وړتیا او قانون پر بنسټ عملي کړي.
د یادونې وړ ده چې دا یوازې د کنړ ولایت د یو شمېر اوسېدونکو روایت دی، افغانستان انټرنشنل - پښتو یې په خپلواکه توګه نه تاییدوي.
