د بدخشان یو اوسېدونکی وایي، له تېرو څو کلونو راهیسې طالبان د بدخشان ولایت په درایم ولسوالۍ کې په بېلابېلو پلمو له خلکو څخه په زور پیسې ټولوي. د هغه په خبره؛ طالبانو په جبري توګه له هر موټر چلوونکي، هټۍوال، لاس پلورونکي او سوداګر پیسې ټولې کړې، چې د درایم سړک به بیاورغوړي؛ خو دغه پیسې یې خپلې جېب ته واچولې.
نوموړي زیاته کړې، طالبانو د درایم او ارګو د سړکونو ترمیم لپاره دوه ځلې پیسې ټولې کړې؛ خو کار یې معلوم نهشو. هغه افغانستان انټرنشنل ته ویلي، طالبانو د درایم ولسوالۍ په مرکز صفا ښار کې د کلینیک لپاره د ځمکې د اخیستلو په نوم له خلکو پیسې ټولې کړې؛ د پیسو له راټولولو څخه دوه کاله تېر شوي، خو لاهم د کلینیک د جوړولو خبر نهشته.
هغه ویلي، د درایم ولسوالۍ مرستیال والي امیري چې د دغه پیسو راټولولو مسوولیت یې لاره؛ په تېرو دوو کلونو کې یې د ۱.۲ مېلیونه افغانیو په ارزښت یوه ځمکه واخیسته، چې تر دې دمه یې یوه دوه پوړیزه ودانۍ پهکې جوړه کړې او کار یې لاهم روان دی.
د هغه په خبره؛ ویل کېږي چې راټولې شوې پیسې د امیري لهخوا په دغه ولسوالۍ کې صرافانو ته په ګټه ورکړل شوې دي. نوموړي زیاته کړې، چې طالبانو د پوهنې ریاست د ودانۍ جوړولو لپاره هم له خلکو پیسې راټولې کړې؛ ودانۍ جوړه شوه خو دوی له خلکو د هغې د ارزښت څو چنده زیات لګښت واخیست.
هغه ویلي، په ۱۴۰۴کال کې د صفا لوی جومات د بیارغونې لپاره ونړول شو؛ طالبانو له خلکو څخه د پیسو راټولولو لپاره له زور څخه کار واخیست او له هر هټۍوال او پلورونکي څخه یې لږترلږه ۱۰۰۰ افغانۍ واخیستې، دوی له ځینو خلکو څخه تر ۶۰زره افغانۍ هم واخیستې.
هغه زیاته کړې، طالبان په میاشت کې څو ځله له خلکو د جوماتونو، پلونو او نورو پروژو د جوړولو په پلمه پیسې ټولوي؛ خو د دغه پیسو حساب کتاب نهشته.
هغه وایي، واک ته د طالبانو له رسېدو وروسته یادې ډلې د خلکو په وړاندې ډېر ظلمونه کړي او دغه وضعیت لاهم په ټول هېواد کې دوام لري. د هغه په وینا؛ د محدودیتونو له امله هیڅوک نهشي کولی د دغه ظلمونو په وړاندې خپل غږ پورته کړي.
