د مرکزي اسیا زون (CAVA) سیالیو کې د افغانستان د والیبال ملي لوبډلې ګډون له ناروښانه حالت سره مخ شوی دی. د افغانستان انټرنشنل د معلوماتو له مخې؛ په کابل کې د پاکستان سفارت لاتراوسه د افغان لوبډلې لوبغاړو او تخنیکي ډلې ته ویزې نهدي ورکړې.
د افغانستان ملي لوبډله له نږدې یوې میاشتې راهیسې په کابل کې په یوه روزنیز کمپ کې په تمرین بوخته ده او په دغه سیالیو کې د ګډون لپاره یې تمرینات لاهم دوام لري؛ خو د پاکستان سفارت لاتراوسه د دوی ویزې نهدي صادرې کړې.
ټاکل شوې ده، چې د مرکزي اسیا زون د والیبال سیالۍ (د چنګاښ ۳۱مه) په اسلاماباد کې د لسو لوبډلو په ګډون ترسره شي. که ویزې ځنډنۍ شي؛ نو په دغه سیالیو کې به د افغانستان د ملي لوبډلې ګډون له جدي ګواښونو سره مخ شي.
افغان لوبډله په وروستیو کلونو کې په دغه سیالیو کې یو له خورا مخکښو او فعالو لوبډلو څخه وه او نه ګډون یې د سیالۍ تخنیکي کچه اغېزمنولای شي. لاتراوسه نه د افغانستان د والیبال فدراسیون او نه هم په کابل کې د پاکستان سفارت د یادې ستونزې په اړه وضاحت ورکړی دی.
د افغانستان د والیبال فدراسیون د دغه سیالیو لپاره ۱۴ لوبغاړي او درې روزونکي اعلان کړي. د لوبغاړو په ډله کې سباوون وردګ، هارون نېکروز، عمران نیازی، بسمالله سلطاني، ناصر کوهستانی، منتظر حسین حفیظي، مطلب محمدي، شاهد بدلون، غلام رسول حیدري، سباوون غورځنګ، عادل شاه ذاکري، ملک مموزی، سید حبیب یوسفي او قادر ځاځی شامل دي. دارنګه د روزونکو په ډله کې محمد اسداللهي، حنیف امیري او محمد داوود مبارز شامل دي.
