فرید بشارت چې د UFC سازمان یو نه ماتېدونکی افغان لوبغاړی دی؛ له امریکایي رسنیو سره یې په مرکه کې ویلي، د پرلهپسې بریاوو سره، سره یې له یاد سازمان څخه د خپل قرارداد د غځولو لپاره کوم وړاندیز نهدی ترلاسه کړی.
بشارت د ۱۶ پرلهپسې بریاوو ریکارډ ثبتولو سره، په دې وروستیو کې د UFC ۳۲۹ سیالیو کې جان ګارزا ته ماتې ورکړه، چې په یاد سازمان کې یې خپله اوومه پرلهپسې بریا ثبت کړه. د یادې لوبې په پای ته رسېدو له UFC سازمان سره د هغه قرارداد هم پای ته ورسېد. هغه تر بریا وروسته د بنټام وېټ په ډلبندۍ کې نهم مقام ترلاسه کړ.
دغه ۲۸ کلن لوبغاړی وايي، چې نه د UFC چارواکو او نه هم د ټورنمنټ ډلې د نوي قرارداد لاسلیک کولو په اړه له هغه یا د نوموړي له مدیر سره اړیکه نیولې ده. دغه افغان لوبغاړي زیاته کړه، چې هغه ځانګړي امتیازات یا د اتلولۍ کمربند لپاره مبارزه نه غواړي؛ بلکې د کوري سنډاګن، ماریو بوتیستا، سونګ یادونګ یا ډیویډ مارټینز په ګډون د مشهورو ورزشکارانو سره د خپل وزن په کټګورۍ کې مبارزه کول غواړي.
هغه په پای کې وویل: «زه فکر کوم چې زه ټول اړین معیارونه لرم او نه پوهېږم، چې نور څه باید ثابت کړم». لاتراوسه UFC د فرید بشارت د قرارداد نه غځولو په اړه رسمي وضاحت نهدی ورکړی.
