د دوبي په ګرمه څپه کې؛ د ننګرهار اوسېدونکي د برېښنا له پرچاوۍ شکایت کوي
د ننګرهار یوشمېر اوسېدونکو افغانستان انټرنشنل پښتو ته په لېږلو پیغامونو کې د برېښنا پرچاوۍ په اړه شکایت کړی. دوی وایي، د هوا له ګرمېدو سره د برېښنا پرچاوي هم ډېره شوې او ورځنی ژوند یې له ګڼو ستونزو سره مخ شوی دی. په ننګرهار کې دامهال د تودوخې لوړه درجه شاوخوا ۴۵ درجې ته رسېدلې.
د ننګرهار یو اوسېدونکی وايي، ننګرهار یو ګرمسیر ولایت دی او په اوړي کې خلک تر بل هر وخت ډېرې برېښنا ته اړتیا لري. د هغه په وینا؛ د برېښنا پرچاوۍ نه یوازې عام وګړي، بلکې سوداګر، پانګهوال او کاروباریان هم له پراخو ستونزو سره مخ کړي دي.
د ننګرهار یو بل اوسېدونکی عنایت الله جلال وايي، له دې کمې برېښنا سره دې ښاریان له اړتیا پرته برېښنا نه کاروي او د بېوزله هېوادوالو اړتیاوې دې هم په پام کې ونیسي. هغه زیاته کړې: «ولس باید د برېښنا په مصرف کې احتیاط وکړي، مثلا که په کولر چاره کېږي نو اېسي ته څه اړتیا ده. دوی به د مصارفو ورکولو توان لري؛ خو غریب ګاونډیان هم باید په نظر کې ونیسي، چې اکثره وخت د بیلونو ورکولو توان نهلري».
په ننګرهار کې د ګرمۍ په زیاتېدو د برېښنا پرچاوي زیاته شوې او په دغه ولایت کې د برېښنا تقاضا ۸۰ مېګاواټه ده؛ خو دامهال دغه ښار ۵۴ مېګاواټه برېښنا لري.
