د کندز ولایت د امامصاحب ولسوالۍ یو شمېر اوسېدونکو افغانستان انټرنشنل - پښتو ته په رالېږلي پیغام کې ادعا کړې چې د ښاروالۍ ځینې چارواکي د فساد ترڅنګ د صابون پلورونکو، کراچیوانانو او دوکاندارانو د کار مخه نیسي او په قراردادونو کې له یوه محدود شمېر کسانو سره همکاري کوي.
د دوی په وینا، د الفبېردي بندر په شاوخوا کې نږدې ۱۵۰ کراچیوانان د ښاروالۍ د چلند له امله له ستونزو سره مخ دي او د کار کولو اجازه نه ورکول کېږي.
د شکایت کوونکو په ادعا، د امامصاحب ښاروال عبدالنبي سهیل د ښاروالۍ په قراردادونو کې له یوه قراردادي، چې تاج محمد نومیږي، په ګډه کار کوي او د ښار مهم قراردادونه هم همدې کس ته سپارل کېږي. دوی همداراز ادعا کړې چې د جمعه خان او عزیز په نوم کسان د ښاروال له نږدې همکارانو څخه دي او د مزدورکارانو او کوچنیو سوداګرو پر وړاندې په اقداماتو کې ورسره ملتیا کوي.
د دوی د شکایت له مخې، پخوا د امامصاحب په مرکزي څلورلارې کې نږدې ۵۰۰ دوکاندارانو فعالیت کاوه، خو ښاروالۍ دغه بازار تخریب کړی او دوکانداران یې له خپلو کاروبارونو بېبرخې کړي دي.
شکایت کوونکي ادعا کوي چې ښاروالۍ د بازار قرارداد د ۳۱ میلیونه افغانیو په بدل کې یوه قراردادي ته ورکړی، خو هماغه پروژه په شاوخوا ۱۲۰ میلیونه افغانیو تطبیق شوې او د دوی په وینا، د پیسو پاتې برخه د قراردادي او ښاروالۍ د چارواکو ترمنځ وېشل شوې ده.
دوی زیاتوي چې د بازار له تخریب وروسته سلګونه دوکانداران بېځایه شوي او اوس د خپلو کاروبارونو د بیا پیل لپاره سرګردانه دي.
د یادونې وړ ده چې دا یوازې د کندز ولایت د امام صاحب د یو شمېر کراچي وانانو شکایت دی، افغانستان انټرنشنل یې په خپلواکه توګه نه تاییدوي.
