د کابل د کلکان ولسوالۍ د سیداباد کلي یو اوسېدونکي افغانستان انټرنشنل ته په رالېږلي پیغام کې ادعا کړې چې د دوی په سیمه کې د زړو ټایرونو د پروسس او سوځولو یوې فابریکې د دوامدار لوګي او تور کاربن د خپرېدو له امله د خلکو باغونه، کرنیزې ځمکې او اقتصادي ژوند له جدي ستونزو سره مخ کړی.
د نوموړي په وینا، دغه فابریکه د محمد حسن ځدړان په نوم یوه کس پورې اړه لري او «۲۴ ساعته لوګی او تور کاربن» فضا ته خوشې کوي.
د هغه په خبره، د فابریکې د لوګي له امله د سیمې د انګورو باغونه زیانمن شوي او سوداګر نور د دوی انګور نه پېري. نوموړی زیاتوي چې د سیمې د ځمکو د پېر او پلور بازار هم اغېزمن شوی او د خلکو ملکیتونه خپل ارزښت له لاسه ورکوي.
نوموړي د سیمې څخه ویډیو ګانې هم افغانستان انټرنشنل سره شریکې کړي دي.
سرچینه ادعا کوي چې د ستونزې د حل لپاره یې څو ځله اړوندو ادارو ته عریضې کړې، خو تر اوسه یې شکایتونو ته رسېدنه نه ده شوې. هغه همداراز ادعا کړې چې د فابریکې مسول د چاپېریال ساتنې او ځینو سیمهییزو ادارو له چارواکو سره د پیسو په ورکړې اړیکې لري، له همدې امله د خلکو شکایتونو ته پام نه کېږي.
له افغانستان انټرنشنل سره شریک شوي سند کې د طالبانو د صنعت او سوداګرۍ وزارت د مرکزي سوداګریزو نښانونو او فکري ملکیت د ثبت ریاست له لوري د «محمد حسن ځدړان د زړو ټایرونو د پروسس او وېلې کولو» په نوم سوداګریز جواز ښکاري.
په دغه جواز کې د سوداګرۍ د فعالیت پته د کابل ولایت د کلاکان ولسوالۍ، د سیداباد کلي ثبت شوې او د جواز د اعتبار موده د ۲۰۲۶ کال د جنورۍ له ۷مې تر ۲۰۲۷ کال د جنورۍ تر ۶مې ښودل شوې ده.
د یادونې وړ ده چې دا د کابل ولایت د کلاکان ولسوالۍ د سیداباد کلي د یو شمېر اوسېدونکو روایت دی، افغانستان انټرنشنل پښتو یې په خپلواکه توګه نه تاییدوي.
