د خوست میخانیکي انسټېټیوټ فارغان: ښاروالۍ مو د عملي دورې اسناد له یوه کال راهیسې ځنډولي
د خوست میخانیکي انسټیټیوټ یو شمېر فارغان ادعا کوي چې د فراغت له څه باندې یوه کال تېرېدو سره سره، د خوست ښاروالۍ لا هم د دوی د عملي (پرکټیک) دورې اسناد نه دي ورکړي او په بېلابېلو پلمو یې ځنډوي.
دوی افغانستان انټرنشنل پښتو ته په استولي پیغام کې ویلي: «موږ تېر کال د خوست میخانیکي انسټیټیوټ څخه فارغ شوي یو، خو تر اوسه ښاروالۍ د پرکټیک دورې اسناد نه دي راکړي. هر ځل راته وایي نن راشئ، سبا راشئ، خو اسناد نه راکوي. موږ نه پوهېږو چې ولې دا بهیر له خنډ او ځنډ سره مخ شوی دی».
دغو فارغانو ویلي چې د عملي دورې د اسنادو نه ترلاسه کول د دوی د راتلونکو زدهکړو او کاري چارو پر بهیر منفي اغېز کړی او له اړوندو چارواکو یې غوښتي چې د دوی ستونزې ته ژر رسېدنه وکړي.
فارغانو د خپلو ادعاوو د ملاتړ لپاره د فراغت د مراسمو انځورونه او ویډیوګانې هم له افغانستان انټرنشنل پښتو سره شریکې کړې دي.
یاده دې وي، چې افغانستان انټرنشنل پښتو دا ادعا په خپلواکه توګه نه تاییدوي، دا یوازې د خوست د میخانیکي انسټېټیوټ د یو شمېر فارغانو روایت دی.
