د افغانستان په علومو اکاډمۍ کې د څېړونکي او لیکوال حبیبالله رفیع د نمانځغونډې یو شمېر ګډونوالو افغانستان انټرنشنل ـ پښتو ته په خپلو روایتونو کې ویلي چې د طالبانو د امر بالمعروف او نهی عن المنکر وزارت محتسبانو د غونډې پر ځای چاپه وهلې او څو ښځینه خبریالانې یې له ځان سره بیولې دي.
د افغانستان د علومو اکاډمۍ د پښتو څېړنو نړیوال مرکز د چنګاښ په ۲۲مه نېټه، له کاناډا څخه کابل ته د بېرته ستانه شوي لیکوال او ادیب حبیبالله رفیع د درناوي لپاره غونډه جوړه کړې وه.
په دې غونډه کې د طالبانو تر واک لاندې د علومو اکاډمۍ مرستیال امیرجان ثاقب، د اطلاعاتو او فرهنګ وزارت نشراتي مرستیال مهاجر فراهي او لسګونو لیکوالو، ادیبانو او فرهنګي څېرو ګډون کړی و.
سرچینو افغانستان انټرنشنل ـ پښتو ته ویلي چې د کابل د یو شمېر خصوصي رسنیو ښځینه خبریالانې هم د غونډې خبري پوښښ ته ورغلې وې.
د سرچینو په وینا، د غونډې له پای ته رسېدو وروسته، چې خبریالانو له حبیبالله رفیع سره مرکې کولې، د امر بالمعروف او نهی عن المنکر وزارت محتسبان د غونډې ځای ته ورسېدل.
سرچینې وايي، طالب محتسبانو د غونډې سمبالوونکي په دې پړه وبلل چې ولې یې د امر بالمعروف وزارت له اجازې او همغږۍ پرته غونډه جوړه کړې او ښځینه خبریالانې یې ورغوښتې دي.
د سرچینو د معلوماتو له مخې، د امر بالمعروف څارونکو څو ښځینه خبریالانې له غونډې نه له ځان سره بیولې دي. لا روښانه نه ده چې خبریالانې کوم ځای ته بیول شوې، څومره وخت ساتل شوې او اوس خوشې شوې دي او که نه.
د غونډې د ګډونوالو په وینا، محتسبانو د علومو اکاډمۍ چارواکو ته خبرداری ورکړی چې په راتلونکي کې د ورته غونډو د جوړولو پر مهال د امر بالمعروف او نهی عن المنکر وزارت ټول امرونه عملي کړي.
دا پېښه داسې مهال شوې چې د همدې غونډې په یوه خپره شوې ویډیو کې امیرجان ثاقب ویلي، دا نمانځغونډه د هغو ادعاوو د ردولو څرګند مثال دی چې ګواکې د طالبانو حکومت د علمي شخصیتونو، لیکوالو او پوهانو درناوی نه کوي.
خو له غونډې د ښځینه خبریالانو د بیولو ادعا یو ځل بیا د طالبانو تر واک لاندې د رسنیو، په ځانګړي ډول د ښځینه خبریالانو، پر فعالیتونو د امر بالمعروف وزارت د پراخېدونکي کنټرول په اړه اندېښنې راپورته کړې دي.
