د میدان وردګو یو شمېر اوسېدونکي: د طالبانو ځواکونه د ټوپ دښتې د شخصي ځمکو نیولو هڅې کوي

د دغو اوسېدونکو په وینا، د یادې ځمکې ټول مالکان د ملکیت رسمي قبالې او نور قانوني اسناد لري او ټینګار کوي چې د ځمکې د نیولو هڅې د دوی له رضایت او د قانوني پرېکړې پرته کېږي.

د ځمکو خاوندان ادعا کوي چې د همدې قضیې په تړاو تر اوسه څلور کسان هم نیول شوي دي. د دوی د کورنیو په وینا، د نیول شویو کسانو د نیولو دقیق علت او قانوني بنسټ تر اوسه نه دی روښانه شوی.

د سیمې اوسېدونکي همداراز وایي چې د طالبانو امنیتي ځواکونه نږدې هره ورځ د ټوپ دښتې سیمې ته ورځي، چې له امله یې د نورو کسانو د احتمالي نیولو په اړه اندېښنې زیاتې شوې دي.

دوی له مسولو ادارو غواړي چې د ځمکو د ملکیت اسناد په شفاف او قانوني ډول وڅېړي، د قضیې په اړه عادلانه او بې‌طرفه پلټنه وکړي او د نیول شویو کسانو د نیولو قانوني دلیلونه روښانه کړي او د هغوی قانوني حقوق خوندي وساتي.

د یادونې وړ ده چې دا یوازې د میدان وردګو د سیداباد د یو شمېر اوسېدونکو روایت دی، افغانستان انټرنشنل په خپلواکه توګه تایید نه کړای شو.