د کابل اوسېدونکی: د کور لوړې کرایې او د بنسټیزو خدمتونو نشتوالي زموږ ژوند له ستونزو ډک کړی
د کابل یوه اوسېدونکي افغانستان انټرنشنل ته په لېږلي پیغام کې ويلي، چې په پلازمېنه کې اوسمهال خلک د څښاک اوبو، کاري فرصتونو او دوامدارې برېښنا په څېر د بنسټیزو خدمتونو له نشتوالي سره مخ دي.
نوموړي زیاته کړې: «موږ د کابل اوسېدونکي د څښاک اوبو، د کاري فرصتونو او دوامدارې برېښنا په څېر د بنسټیزو خدمتونو له نشتوالي سره مخ یو. که څه هم د دغه اړتیاوو پوره کول د چارواکو مسوولیت دی؛ خو په دې برخه کې لاهم جدي ستونزې شته، چې د خلکو ژوند یې ستونزمن کړی دی».
هغه وایي: «موږ په چارواکو غږ کوو، چې د څښاک اوبو برابرولو، د کاري فرصتونو رامنځته کولو، د برېښنا وضعیت د ښه کولو او د ښاریانو د غوښتنو پوره کولو لپاره عملي او اغېزمن اقدامات ترسره کړي».
د هغه په وینا؛ په پلازمېنه کې د دوی یو له لومړنیو اړتیاوو څخه مناسب کور دی. هغه وایي، ګڼې کورنۍ د ځمکې او کورونو د لوړې بیې او د ملاتړ پروګرامونو د نشتوالي له امله نهشي کولی چې د ځان لپاره کور وپېري او له دې امله په کرایي کورونو کې اوسېږي.
هغه له طالبانو غوښتنه کړه، چې د کور جوړولو لپاره د کم عاید لرونکو کورنیو په ملاتړ عملي پروګرامونو ته لومړیتوب ورکړي. د هغه په وینا؛ د مناسب کور درلودل د هر وګړي حق دی او د یادې ستونزې حل کولی شي د خلکو د ژوند شرایط ښه کړي.
