د کاپیسا ولایت د نجونو له یوه ښوونځي یوې ښوونکې افغانستان انټرنشنل ته په رالېږلي پیغام کې ویلي، چې نږدې یو کال کېږي هره میاشت د یاد ولایت د ټولو ښوونکو له تنخوا له ایران او پاکستان نه د ستنو شویو کډوالو په نوم ۱۰۰ افغانۍ ګرځول کېږي.
هغې ویلي، چې دغه پیسې په جبري توګه ټولېږي او هېڅ ښوونکې د انکار حق نهلري. د هغې په وینا؛ د ښوونځیو مدیرانو ته خبرداری ورکړل شوی که له ښوونکو پیسې ټولې نهکړي، نو د ټولو ښوونکو پیسې به خپله مدیران ورکوي.
د نوموړې په خبره؛ د دغه میاشتني کسر ترڅنګ، وخت ناوخت د بېلابېلو پېښو په نوم لکه د هرات زلزله ځپلو، د کونړ زلزلهځپلو او کله هم د غزې او منځني ختیځ له خلکو سره د مرستې په نوم له ښوونکو پیسې ټولېږي.
هغې ویلي: «زه خپله کور نهلرم او شاوخوا لس کاله کېږي، چې له خپل اصلي استوګنځي بېځایه شوې یم. په ۷زره افغانۍ تنخوا د نهو اولادونو لګښتونه مې تر غاړې دي او د دې وس نهلرم، چې له نورو سره مرسته وکړم. نه پوهېږم د خپلو ماشومانو لپاره ډوډۍ برابره کړم که کډوالو او نورو سره مرسته وکړم».
د هغې په وینا؛ اوسنی وضعیت بېساری دی او د پخوانیو حکومتونو سره د پرتلې وړ نهدی. دغې ښوونکې زیاته کړې، چې د خپلې دندې له لاسه ورکولو له وېرې هیڅ څوک نهشي کولی په ښکاره اعتراض وکړي.
د هغې په خبره؛ که څوک خپل غږ پورته کړي، د دندې ګوښه کېدو او د همدې لږې تنخوا له لاسه ورکولو له ګواښ سره مخ کېږي. هغې په پای کې ویلي، له ټولو ستونزو سره، سره لاهم د خدای پر عدالت باور لري او هیله لري چې یوه ورځ به دغه وضعیت ته د پای ټکی کېښودل شي.
