په کندوز کې له پاکستان نه تازه ستانه شوي افغان کډوال وايي، له شاوخوا لسو میاشتو راهیسې لاهم سرپناه نهلري او له سختو ستونزو سره مخ دي. د دوی په وینا؛ د سختې ګرمۍ له امله په پنډغالو کې تر خېمو لاندې په نږدې هره کورنۍ کې دوه یا درې ماشومان ناروغان دي.
په کندوز کې د کډوالو په پنډغالي کې مېشتو کډوالو افغانستان انټرنشنل پښتو ته ویلي، د اوسېدو لپاره مناسب ځای نهلري او په هره خېمه کې له ۸ تر لسو کسانو اوسېږي.
په دغه پنډغالي کې د سلطان په نوم یو بل کډوال وایي، د پنډغالي اوسېدونکو نوملیکنه شوې او ورسره ژمنه هم شوې وه، چې د اوسېدو لپاره به کورونه ورکړل شي؛ خو تر لسو میاشتو وروسته هم هېڅ کور نهدی جوړ شوی.
هغه زیاتوي، اوس ورته ویل کېږي چې دغه پنډغالی په یوه پارک کې جوړ شوی او ښايي بل ځای ته ولېږدول شي، چې دا به د دوی ستونزې لا زیاتې کړي. د سلطان په خبره؛ د څښاک اوبو کمښت هم جدي ستونزه ده او خلک اوبه په ډبرو او لوښو کې له لرې ځایه راوړي.
یو بل کډوال بیا د نوم نه ښودلو په شرط وایي، د راستنېدو په لومړیو کې ځینو مرستندویه بنسټونو هم د دوی نوملیکنه کړې او د مرستو ژمنې یې کړې وې؛ خو دغه بنسټونه د طالبانو له اجازې پرته فعالیت نهشي کولای.
هغه ادعا کړې، چې د ملګرو ملتونو د کډوالو عالي کمېشنرۍ شاوخوا لس میاشتې وړاندې د پنډغالي ټولو کورنیو ته د مرستو د ترلاسه کولو لپاره بانکي کارتونه ورکړي وو؛ خو تراوسه یې هېڅ مالي مرسته نهده ترلاسه کړې.
هغه وايي، د پنډغالي اوسېدونکي نهشي کولای خپلې ستونزې رسنیو ته په ازاد ډول بیان کړي.
دا په داسې حال کې ده، چې د طالبانو د کډوالو د دایمي مېشتېدنې او د ځمکو وېش کمېټې د شمېرو له مخې پر ستنو شویو کډوالو د وېشل شویو استوګنیزو نمرو شمېر ۶۰ زرو ته لوړ شوی.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
