د ژغورنې نړیوالې کمېټې د افغانستان د پروګرامونو مرستیال مشر بوستان فهیم وايي، افغانستان لا هم له ژور بشري ناورین سره مخ دی او شاوخوا نیمایي وګړي یې د ژوند د لومړنیو اړتیاوو د پوره کولو لپاره بشري مرستو ته اړتیا لري.
نوموړي یوې تلویزیوني مرکې کې ویلي، چې ژغورنې نړيواله کميټه له ۱۹۸۸ کال راهیسې په افغانستان کې فعالیت کوي او دا مهال په بېلابېلو ولایتونو کې د روغتیا، تغذیې، پاکو اوبو، حفظ الصحې، خوندیتوب، اقتصادي بیارغونې او بېړنیو مرستو پروګرامونه پلي کوي.
د هغه په وینا، دغه اداره د افغانستان په شمالي، ختیځو او لوېدیځو سیمو کې حضور لري او د هرې سیمې اړتیاوو ته په کتو خپل خدمات تنظیموي.
فهیم ویلي، اوس مهال د افغانستان تر ټولو ستره بشري اړتیا د خلکو د ژوند د بقا او معیشت ساتل دي.
هغه زیاته کړې: «نږدې ۵۰ سلنه افغانان پر بشري مرستو متکي دي او ډېرې هغه ټولنې چې موږ ورسره کار کوو، د ستونزو پر وړاندې د مقاومت وړتیا له لاسه ورکوي.»
بوستان فهیم د اقلیمي بدلون اغېزې هم جدي اندېښنه بللې او ویلي یې دي، په ځینو سیمو کې تېر کال د اورښت کچه ۴۵ سلنه کمه وه.
نوموړي وویل چې د افغانستان شاوخوا ۷۰ سلنه وګړي د کرنې او مالدارۍ له لارې خپل ژوند پر مخ وړي، او د وچکالۍ دوام یې اقتصادي وضعیت لا خرابوي.
فهیم ویلي، چې ژغورنې نړيواله کميټه دا مهال ۱۵ روغتیايي مرکزونه چلوي او د ښځو د اقتصادي پیاوړتیا لپاره ځانګړي پروګرامونه هم لري، څو هغوی وکولای شي د خپلو کورنیو لپاره عاید پیدا کړي.
هغه ټینګار کړی چې د افغانستان د ستونزو حل یوازې په بېړنیو مرستو کې ندی نغښتی، بلکې اوږدمهاله پانګونې ته اړتیا شته.
د هغه په وینا، د یادې کمیټې اوږدمهاله موخه دا ده چې افغانان داسې ظرفیتونه او امکانات ولري چې له بشري مرستو پرته خپلې اړتیاوې پوره کړای شي.
فهیم ویلي: «موږ د داسې افغانستان هیله لرو چېرته چې خلکو ته د بشري مرستو اړتیا نه وي او خپله د خپلو ستونزو د حل توان ولري.»
د نوموړي په وینا، روغتیا، تغذیه، پاکې اوبه، خوندیتوب، زدهکړې او اقتصادي پراختیا هغه برخې دي چې د افغانستان د اوږدمهاله ثبات او پرمختګ لپاره ورته ځانګړې پاملرنه اړینه ده.
