د طالبانو د کورنیو چارو وزارت خبر ورکړی چې د تروریزم پر وړاندې د مبارزې ځواکونو یې په پکتیکا، نیمروز او هلمند ولایتونو کې د جلا جلا عملیاتو په ترڅ کې ۱۴ کسان نیولي دي. د یاد وزارت د خبرپاڼې له مخې، دغه کسان د ځمکې لاندې خزانو او قیمتي فلزاتو د موندلو او غلا په تړاو نیول شوي دي.
خبرپاڼه زیاتوي چې د پکتیکا ولایت د شخېلاباد ولسوالۍ امنیتي منسوبینو د کشفي عملیاتو په ترڅ کې اته تنه د ځمکې لاندې خزانو او قیمتي فلزاتو د موندلو لپاره د ځانګړو وسایلو د کارولو په تړاو نیولي دي.
د دغه وزارت په وینا، په نیمروز ولایت کې هم څلور تنه د موبایلونو او موټرسایکلونو د غلا په تور نیول شوي دي.
د کورنیو چارو وزارت زیاتوي چې په هلمند ولایت کې دوه تنه نور د درې میلیونه پاکستانۍ کلدارو د غلا په تړاو نیول شوي دي.
وزارت د نیول شویو کسانو د اوسني وضعیت او هویت په اړه نور معلومات نه دي وړاندې کړي.
