د محمد تمیم صدیقي په نوم یو افغان وايي، له پاکستان نه تر جبري ستنېدو وروسته په افغانستان کې هغه او د کورنۍ غړي یې له امنیتي ګواښونو او جدي بشري ستونزو سره مخ دي. نوموړي ویلي، د دغه پېښو د ګواښ لیکونه، اسناد، د روغتون طبي اسناد او شاهدان هم لري.
د صدیقي په نوم دغه کس ویلي، چې پلار یې پخوا وژل شوی او ورو یې هم په ډزو ټپي شوی دی. هغه ادعا کړې، چې یوه شپه ناوخته یې پر کور وسلهوالو برید وکړ او هڅه یې کوله چې د هغه ورور ووژني.
د نوموړي په خبره، په دې برخه کې بشپړ اسناد او شواهد لري او حاضر دی چې اړوندو ادارو ته یې وسپاري. صدیقي د دغه پېښو د ځای او وخت په اړه معلومات نهدي شریک کړي.
د هغه په خبره، کورنۍ یې د ملګرو ملتونو د کډوالو عالي کمېشنرۍ او نورو ادارو اسناد هم لرل؛ خو پاکستاني پولیسو یې کورنۍ په جبري ډول له دغه هېواده واېستله، چې له بېرته ستنېدو وروسته یو ځل بیا له امنیتي اندېښنو سره مخ شوی دی.
صدیقي وايي، اوس په افغانستان کې له اقتصادي او روغتیايي ستونزو سره مخ دی. هغه زیاته کړې: «مېرمن مې امېندواره ده او په صفرا (تریخي) کې د ډبرو له امله د جراحۍ سپارښتنه ورته شوې ده. د خپلې څلور کلنې لور او د خپل روغتیايي وضعیت په اړه هم اندېښمن یم».
