د امریکا د بهرنیو چارو وزیر مارکو روبیو په خپل ۳۱م بهرني سفر کې له منځنۍ او جنوبي اسیا سره د امریکا د اقتصادي او امنیتي اړیکو د پیاوړتیا په موخه ازبکستان ته روان شوی او ټاکل شوې، چې نوموړی په سمرقند کې د«سی۵+۱» غونډې کې له ګډون وروسته هند ته ولاړ شي.
د اسوشیټېډ پرېس خبري اژانس د راپور له مخې، که څه هم د روبیو د دې سفر تمرکز له سیمې سره د اقتصادي او امنیتي اړیکو پر پراختیا دی، خو دا سفر د ډونالډ ټرمپ د ادارې د بهرني سیاست له مهمو ننګونو، لکه په منځني ختیځ کې کړکېچ او د روسیې او اوکراین جګړې سره تړاو نه لري. دې موضوع د روبیو د ډیپلوماټیکې تګلارې په اړه نیوکې راپارولې دي.
مارکو روبیو سیمې ته تر روانېدو مخکې خبریالانو ته د خپل سفر د پروګرام په دفاع کې ویلي: «له دغو هېوادونو سره اړیکې ډېرې مهمې دي. ډېری وخت ستراتیژیک سفرونه اغېزمن کیږي، ځکه اړ کېږئ هغو ځایونو ته ولاړ شئ چې هلته کړکېچ یا ستونزه وي، یا کنفرانس جوړېږي. خو په دې ډله کې داسې هېوادونه هم شته چې د دوهاړخیزو اړیکو د پراختیا لپاره باید ورسره لیدنې وشي.»
په همدې حال کې، د امریکا ځینو پخوانیو ډیپلوماټانو د روبیو پر بهرنیو سفرونو نیوکې کړې دي. په ناټو کې د امریکا پخواني سفیر ایوو ډالدر ویلي، روبیو د غزې، ایران او اوکراین په څېر د کړکېچ له مهمو مرکزونو لرې پاتې شوی او هغو سیمو ته ډېر سفرونه کوي چې سیاسي خطرونه پکې کم او د ناکامۍ احتمال پکې لږ دی.
د دغو نیوکو په غبرګون کې، د امریکا د بهرنیو چارو وزارت په یوه اعلامیه کې ویلي چې د بهرنیو چارو د وزیر اصلي دنده په هر کړکېچ کې د خلکو پام ځان ته رااړول نه دي، بلکې له ولسمشر سره د هغې ستراتیژۍ په جوړولو او پلي کولو کې مرسته کول دي چې د امریکا ملي ګټې خوندي کړي.
دغه وزارت زیاته کړې چې د ډیپلوماټیکو فعالیتونو ډېره برخه د رسنیو له سترګو لرې ترسره کېږي او روبیو د ایران، غزې، اوکراین او چین په اړه د پردې تر شا خبرو اترو کې مستقیمه ونډه لري.
د امریکا د بهرنیو چارو وزارت مرستیال کریسټوفر لاندو هم د نیوکهکوونکو د دریځ په غبرګون کې، د هغوی لیدلوری له ډیپلوماټیکو زړو فکرونو اغېزمن شوی بللی. نوموړي ټینګار کړی چې له لاتینې امریکا او منځنۍ اسیا په ګډون د نړۍ له بېلابېلو سیمو سره د اړیکو پیاوړتیا د واشنګټن د عمومي ستراتیژۍ برخه ده او د امریکا ډیپلوماسي باید یوازې د اروپا پر پلازمېنو محدوده نه وي.
