وزیرستان کې له هوايي بریده زیانمن شوي: پوځ او طالبان دې له استوګنې سیمو بهر سره معلومه کړي
د خیبرپښتونخوا شمالي وزیرستان کې د ډرون برید له امله زیانمنه شوې کورنۍ وايي، د پاکستان پوځ او د تحریک طالبان پاکستان دې له استوګنې سیمو بهر سره معلومه کړي او ملکي وګړي دې د جګړې قرباني نه ګرځوي. د ملي ډیموکراټیک غورځنګ مشر مُحسن داوړ هم پر دغه برید کلکه نیوکه کړې ده.
د خیبرپښتونخوا د شمالي وزیرستان په درپاخېل سیمه کې د ډرون برید له امله د زیانمن شوي کور مشر د پاکستان له پوځ او پاکستاني طالبانو غوښتي، چې د ملکي وګړو د سر او مال خوندیتوب ته په جدي توګه پام وکړي او هغوی دې د جګړې قرباني نه ګرځوي.
نوموړي ویلي، تېره شپه (جمعه د لړم لومړۍ) د یوه برید له امله یې کور ته سخت زیان اوښتی دی. هغه له حکومت او پوځ څخه غوښتي: «روښانه کړئ چې له اسمانه راپرېوتونکي توکي څه دي؟ مرمۍ، ډرونونه که توغندي؟ ډرونونه او هویۍ ګولۍ له کومه راځي»؟
د هغه په وینا، د دواړو لورو د ډزو او بریدونو له امله ماشومان، ښځې او سپینږیري وژل کېږي او ټپیانېږي او پاتې نور هره شېبه په وېره کې تېروي.
د زیانمن شوي کور مشر له پوځ او طالبانو غوښتي، که د دوی ترمنځ جګړه وي، نو له استوګنې سیمو بهر دې سره معلومه کړي او عام خلک دې له جګړې لرې وساتي.
له دې سره سم، د ملي ډیموکراټیک غورځنګ مشر مُحسن داوړ د شمالي وزیرستان د درپاخېل پر سیمه د کواډکاپټر ډرون برید غندلی او ویلي یې دي، چې په دې برید کې یو کور زیانمن شوی او کورنۍ له سختې روحي صدمې سره مخ شوې ده.
محسن داوړ د شنبې په ورځ (د لړم ۲مه) په خپله اېکسپاڼه زیاته کړې، چې د بېګناه ملکي وګړو پر کورونو بریدونه امنیت نهشي تأمینولای، بلکې عامو خلکو ته د سزا ورکولو په معنا دي.
نوموړي ټینګار کړی، چې د امنیتي اقداماتو پر مهال باید د ملکي وګړو ژوند، کورونه او شتمنۍ خوندي وساتل شي او عام خلک باید د جګړو او عملیاتو بیه پرې نهکړي.
د یادونې وړ ده، چې د خیبرپښتونخوا ځايي حکومت او د پاکستان پوځ لا تر اوسه د دغه شوي برید په تړاو څه سپیناوی نهدی کړی.
