ټرمپ د کانګرس د منځمهاله ټاکنو په درشل کې خپله وروستۍ کمپایني وینا وکړه
د امریکا ولسمشر ډونالډ ټرمپ د کانګرس د منځمهاله ټاکنو له پیلېدو څو ساعته مخکې، په واشنګټن ډيسي کې د لنکن یادګار ترڅنګ خپلو پلویانو ته وروستۍ کمپایني وینا وکړه.
د فاکس نیوز د راپور له مخې، د ټرمپ د وینا پرمهال د امریکا د پټو خدمتونو د ځانګړو نښهویشتونکو ځواکونو غړي د امنیت ساتنې لپاره د لنکن یادګار په شاوخوا کې ځای پر ځای شوي وو.
دغه وینا داسې مهال شوې، چې امریکایان د سېشنبې په ورځ د رایې ورکولو لپاره چمتو کېږي. په دغه ټاکنو کې د کانګرس د دواړو جرګو د کنټرول برخلیک ټاکل کېږي.
د ټرمپ دغه حضور د لنکن یادګار د بیارغونې له کارونو وروسته ترسره شو. دا په داسې حال کې ده، چې نوموړی د امریکا د پلازمېنې د بڼې د بدلولو لپاره خپلې طرحې هم څاري، چې پهکې د یوې سترې دروازې جوړول هم شامل دي.
