خالد حنفي: که موږ د «امیرالمومنین» فرمانونه ښه تشریح کړو بیا دښمن درز پیدا کولی نهشي

د طالبانو د امربالمعروف او نهی عنالمنکر وزیر خالد حنفي وایي، که د دوی د رژیم غړي او علما خلکو ته په ښه توګه د ملا هبت الله فرمانونه تشریح کړي، نو د دوی منځ کې بیا دښمن درز نهشي پیدا کولی.
نوموړي د دوشنبې په ورځ د لړم په ۲۵مه کابل پوهنتون کې د ملا هبت الله په ملاتړ غونډه کې زیاته کړه چې د امربالمعروف د اسلامي نظام هغه اصل دی چې نور نظامونه یې نه لري او همدا یې له نورو نظامونو سره یوازینی بېلیدونکی ټکی دی.
خالد حنفي زیاتوي: «فتحې نه مخکې مونږ کې خوف ډېر و، د خدای خوف هم و او نور هم و. مونږ په یوه ورځ نهه کورونه بدل کړل او لسم کور کې مو شپه وکړه». هغه له دیني عالمانو غوښتنه کړې چې د طالبانو د رژیم د دښمنانو تبلیغاتو مخنېوي لپاره هلې ځلې وکړي.
د طالبانو د امربالمعروف وزیر وړاندې وویل: «مصلحت هم په اسلام کې شته، خو په قوانینو کې سنجول شوی دی. مونږ او تاسې باید احساس کمتري ونهکړو، ځکه اسلامي نظام پلی دی». هغه زیاته کړې چې طالبان اوس مهال د خدای په ازموینه کې دي او باید د تاریخ لپاره غوره کړنې پرېږدي.
خالد حنفي د طالبانو هغه وزیر دی چې په سختدریځو څرګندونو مشهور دی او د هغه په مشرۍ د امربالمعروف وزارت د هېواد په بېلابېلو ولایتونو کې په بېلابېلو پلمو ښځې، ځوانان او عام وګړي ځورولي او ان شکنجه کړي دي. د طالبانو دغه وزارت د ملا هبت الله د ټولو سختدریځو قوانینو د عملي کېدو مسوولیت لري او تر ډېره یې د ښځو اړوند لګول شوي سخت بندیزونو او محدودیتونو باندې څار کړی دی.
