د اتریش د اساسي قانون محکمې د دوشنبې په ورځ وویل، چې په ښوونځیو کې به له ۱۴ کلونو څخه د کم عمره مسلمانو نجونو پر حجاب د نوي بندیز په اړه د راتلونکي کال په لومړۍ نیمایي کې پرېکړه وکړي.
د هرات په غوریان ولسوالۍ کې ځايي سرچینو افغانستان انټرنشنل ته وویل، چې د خالد او ادریس په نومونو د دوو ماشومانو مړي د هغوی له لادرکه کېدو څو ورځې وروسته موندل شوي. د سرچینو په وینا، دا دوه ماشومان د خپلې کورنۍ د یوه غړي د ویر د مراسمو پر مهال لادرکه شوي وو.
د بښنې نړیوال سازمان د پاکستان د پخواني لومړي وزیر عمران خان د دریو خویندو او د تحریک انصاف ګوند د فعالانو نیول غندلي دي. دغه سازمان دا نیونې د بیان ازادۍ او سولهییزو غونډو له حقونو سرغړونه بللې ده.
د طالبانو د صنعت او سوداګرۍ وزیر د بریتانیا له ځانګړي استازي سره په انلاین ناسته کې د اقتصادي اړیکو، صادراتو او له نړیوالې ټولنې سره د تعامل په اړه خبرې کړې دي. د طالبانو یاد وزارت ویلي، چې برېتانیا غواړي له افغانستان سره همکاري له بشري مرستو نه اقتصادي همکاریو ته واړوي.
د امریکا ولسمشر ډونالډ ټرمپ د یکشنبې په ورځ د یمن له ولسمشر رشاد العليمي سره ټیلیفوني خبرې کړې دي. له موضوع د څلورو باخبره سرچینو په وینا، په دې خبرو کې د ایران پلوه وسله والو له خوا د بابالمندب تنګي شاوخوا مهمو سیمو د نیولو په اړه بحث شوی، خو ټرمپ د مرستې ژمنه نه ده کړې.
د طالبانو د بهرنیو چارو وزارت په کابل کې د پاکستان سفارت شارژدافیر احضار کړی او په کونړ او پکتیکا کې د پاکستاني پوځ د هوايي بریدونو په تړاو یې خپل اعتراض لیک ور سپارلی دی. طالبانو دغه بریدونه د افغانستان د ملي حاکمیت او ځمکنۍ بشپړتیا نقض بللي او د پاکستان ادعاوې یې رد کړې دي.
په افغانستان کې د ملګرو ملتونو مرستندوی دفتر(یوناما) تایید کړې، چې د دوشنبې په ورځ پر کونړ ولایت په هوایي بریدونو کې لږ تر لږه درې ملکي وګړي، چې یو سړی، یوه ښځه او یوه نجلۍ پکې شامل دي، وژل شوي دي. یوناما ویلي، چې په بریدونو کې څلور نور کسان ټپیان شوي دي.
د طالبانو د کورنیو چارو وزارت خبر ورکړی چې د هېواد په پنځو ولایتونو کې یې د جرمونو په تړاو ۱۸ کسان نیولي دي. د دغه وزارت د معلوماتو له مخې، په کونړ کې شپږ کسان د لرګیو د قاچاق او په بادغیس کې شپږ نور په لرغونو سیمو کې د ناقانونه کیندنو په تور نیول شوي دي.
د طالبانو د میدان وردګ ولایت ښاري ابتدایه محکمې اعلان کړی، چې د سې شنبې په ورځ پر دریو کسانو د درو وهلو سزا تطبیقوي. د طالبانو محکمې د سزا د نندارې لپاره خلک غازي امان الله خان لوبغالي ته بللي دي. طالبانو په تېرو څو میاشتو کې د تعزیري سزاوو له رسنیز کولو ډډه کړې ده.
د طالبانو د کرنې وزیر عطاالله عمري په کابل کې د ایران له سفیر علی رضا بیکدلي سره په لیدنه کې ویلي، چې ددوی یو تخنیکي پلاوی به ډیر ژر ایران ته لاړ شي. د ایران سفیر ویلي، چې هېواد یې له افغانستان سره د کرنې، مالدارۍ او نساجي په برخو کې همکاریو ته چمتو دی.
حال وش سازمان یوه ویډیو خپره کړې، چې ښيي یو شمېر ایران پلوه افغان وسله وال د سیستان او بلوچستان په سراوان سیمه کې د نجونو په یوه نوي ښوونځي کې پوځي تمرینونه کوي. دغه ویډیو د وږي په ۲۹مه ثبت شوې او وسله وال پکې د ښوونځي په انګړ کې په وسلو سمبال لیدل کېږي.
د ملګرو ملتونو د بشري حقونو شورا د ۶۳مې غونډې په ترڅ کې د بشري حقونو یو شمېر سازمانونو غوښتي چې د افغانستان لپاره د یاد سازمان د ځانګړي راپور ورکوونکي ماموریت وغځوي او د ښځو او نجونو د حقونو په تړاو د ځانګړو راپورونو او متقابلو بحثونو دوام تضمین کړي.
په هرات ولایت کې د طالبانو او ترکمنستان د تخنیکي پلاوي ترمنځ د دوه اړخیزو ترانسپورټي او ترانزیتي اړیکو د پیاوړتیا په موخه دوه ورځنۍ ناسته پیل شوې ده. په دې ناسته کې د طالبانو د بهرنیو چارو، صنعت او تجارت او د ریل پټلۍ د ادارو استازي ګډون لري.
د پاکستان حکومت ویلي چې ځواکونو یې په کوهاټ او هنګو ولسوالیو کې له عملیاتو وروسته «د افغانستان پولې ته څېرمه د وسله والو ډلو پر مرکزونو او پټنځایونو» هوايي بریدونه کړي دي. اسلام اباد په بریدونو کې د « ۲۸ وسله والو» د وژلو ادعا کړې خو طالبان وايي، په بریدونو کې ملکي وګړي وژل شوي.
د تېر جمهوري نظام د ملي امنیت رییس معصوم ستانکزی وایي، پاکستان تل د افغانستان په اړه له ناکام او دښمنۍ ډک سیاست نه کار اخیستی چې د دواړو هېوادونو ولسونو ته یې سخت زیان رسولی دی. هغه زیاته کړې، چې پاکستان هغه «لړمان» خپله روزلي او اوس یې باید خپله کابو کړي.
د طالبانو مخالفه مقاومت جبهه وايي، چې د دې ډلې یو جګپوړی غړی صالح محمد ریګستانی افغانستان ته تللی دی. یادې جبهې د دوشنبې په ورځ د ریګستاني یوه ویډیو خپره کړه چې هغه په یوه غرني سیمه کې پکې لیدل کیږي.
د طالبانو د کندهار والي ملا شیرین د ددې ډلې د شهیدانو او معلولانو له وزیر ملا عبدالمجید سره په کتنه کې د طالبانو د وژل شویو غړو او معلولانو کورنیو ته د سرپناه پر جوړولو خبرې کړې دي. ټاکل شوې په ژیړۍ ولسوالۍ کې د هغوی لپاره پر سل جریبه دولتي ځمکې یو ښارګوټی جوړ شي.
د ایران د دوغارون ګمرک مسوولان وایي، د روان کال له پیل راهیسې یې افغانستان ته «د ۱۸۰ میلیارده ریالو د قاچاق» مخه نیولې ده. یاد چارواکي وايي، ۶۰ سلنه پیسې د مسافرو له توکو او ۴۰ سلنه د ایران او افغانستان له ترانسپورټي وسایطو ترلاسه شوې دي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې محتسبینو یې په سرپل او نیمروز ولایتونو کې درې کوډګر نیولي دي. د یاد وزارت په وینا، دغه کسان د سیمې اوسېدونکو د شکایتونو تر ثبت او ارزونې وروسته د دغه وزارت د محتسبینو د څار پرمهال پېژندل شوي دي.
په بادغیس کې د طالبانو امینه قوماندانۍ خبر ورکړی، چې د جوند ولسوالۍ په «ګلک» سیمه کې یې د عملیاتو پرمهال شپږ کسان د ناقانونه کېندنو، د تاریخي اثارو او ګران بیه ډبرو د پلټنې په تور نیولي دي.
د طالبانو تر واک لاندې د دولتي شرکتونو عمومي ریاست وايي، د اریانا افغان هوايي شرکت یوه (بي۷۳۷-۳۰۰) چارتر کارګو الوتکه نن د کابل نړۍوال هوايي ډګر ته رسېدلې او ټاکل شوې چې د سوداګریزو توکو د لېږد لپاره په نړۍوالو مسیرونو کې وکارول شي.