د سولې د نوبل جایزې ګټونکې ملاله یوسفزۍ وایي، افغان نجونې له خپل راتلونکي څخه بېبرخې شوي خو د طالبانو د ځپونکي رژیم پر وړاندې مقاومت کوي. هغې زیاته کړې چې طالبان، په افغانستان کې د لوېدیځ د لاسوهنو زېږنده ده او دوی د ټولو افغانانو استازیتوب نهشي کولای.
یو شمېر افغان ښځینه فعالانو د ملګرو ملتونو د عمومي اسامبلۍ د ۸۱مې غونډې په څنډه کې په یوه ناسته کې له نړیوالې ټولنې غوښتي چې د افغان ښځو د وضعیت په اړه له اندېښنو څرګندولو او تکراري ژمنو تېر شي او د عدالت، حساب ورکونې او په سیاسي بهیرونو کې د ښځو د ګډون لپاره عملي اقدامات وکړي.
د امریکا د پوځي او امنیتي چارو ویبپاڼې «سوفریپ» په یوه تحلیلي راپور کې ادعا کړې چې د ترکیې او قطر لوړپوړو امنیتي چارواکو د سپټمبر پر ۱۶مه په کابل کې له طالب مشرانو سره د القـ .ـاعدې، د دوحې تړون، د تحریک طالبان پاکستان او د بلوچستان ازادۍ پوځ په اړه خبرې کړې دي.
د پېښور عالي محکمې په پښتونخوا کې په طبي او د غاښونو په پوهنځیو کې د زده کړه کوونکو افغان محصلینو د جبري ایستلو مخه نیولې او اړوندو ادارو ته یې د ۱۴ ورځو په موده کې د ځواب د ورکولو امر کړی دی.
د ملګرو ملتونو سرمنشي خبرداری ورکړی، چې د جګړو ډېرېدو د نړۍ وضعیت خراب کړی دی. نوموړي زیاته کړې چې اختلافاتو د امنیت شورا کار فلج کړی او بېوزله خلک یې له سختو شرایطو سره مخ کړي دي.
د تحریک انصاف ګوند مشر بیرسټر ګوهر وايي، دوی ته ګواښ کېږي چې د سپټمبر پر ۲۷مه د اسلاماباد لاریون پر مهال به له دوی سره د ترهګرو په څېر چلند وشي. هغه پوښتنه کړې چې ایا موږ ترهګر یو؟. ګوهر زیاته کړې، ګوند به یې د عمران خان لپاره د غږ پورته کولو په موخه سولهییز ډول لاریون وکړي.
په غزه کې سلګونه زره فلسطیني ماشومان، له نږدې درې کلن ځنډ وروسته د لومړي ځل لپاره بېرته ښوونځیو ته ستانه شول. دا زدهکوونکي په داسې حال کې ویجاړو شویو ودانیو، لنډمهالو ټولګیو او خېمو ته لاړل چې د زدهکړې د لومړنیو توکو له سخت کمښت سره مخ دي.
د سره صلیب نړیواله کمېټه وايي، په ټوله نړۍ کې د وسلهوالو شخړو شمېر د ریکارډ تر کچې لوړ شوی او لا هم د زیاتېدو په حال کې دی او له امله یې د ملکي وګړو پر وړاندې د جګړو ویجاړونکي اغېز لا پراخ شوی دی.
د ښځو او نجونو په چارو کې د بریتانیا ځانګړې استازې هریټ هارمن، ویلي چې لندن د طالبانو له لوري د افغان ښځو او نجونو پر حقونو، ازادیو او ټولنیز مشارکت د لګېدلو «سیستماتیکو محدودیتونو» په اړه ژوره اندېښنه لري او غندي یې.
د ایرلنډ د بهرنیو چارو وزیرې هلېن مکنټي، ویلي چې نړیوالې ټولنې د افغانستان د ښځو او نجونو د وضعیت په اړه کافي خبرې کړې دي او اوس د عملي اقداماتو وخت رارسېدلی دی.
د طالبانو مخالفې وسلهوالې ډلې، متحدې جبهې ادعا کړې چې د بادغیس ولایت د جوند ولسوالۍ په دهن کوچه او خم جنگل سیمو کې یې یو وسلهوال طالب په نښه کړی او هغه یې وژلی دی.
په داسې حال کې، چې ګڼو افغانانو پر کونړ او پکتیکا د پاکستان بریدونو غندلي، د طالبانو رییس الوزرا ملامحمد حسن اخوند د دې بریدونو د غندلو پر ځای د متحده عربي اماراتو د ولسمشر مرستیال او د دوبۍ حاکم شیخ محمد بن راشد ال مکتوم ته د هغه د ورور پر مړینه تسلیت ویلی دی.
د افغان ایواک مشر شان وانډیور ادعا کوي چې د امریکا د بهرنیو چارو وزارت هغه اداره چې د کډوالو د بیا مېشتولو مسولیت لري، د کانګرس له خوا د خلکو د خوندي انتقال لپاره ځانګړې شوې ۴۱۰ میلیونه ډالره بودجه د شړلو په عملیاتو کې لګوي.
د ملګرو ملتونو د بشري حقونو عالي کمېشنر فولکر تورک وایي، د ښځو حقونه باید له طالبانو سره د نړیوالې ټولنې د تعامل په مرکز کې وي. نوموړي د ملګرو ملتونو د عمومي اسمبلۍ په څنډه کې وویل، نړۍ په افغانستان کې د بشري حقونو د سرغړونو پر وړاندې لازم دریځ نه دی نیولی.
د پښتونخوا اعلی وزیر سهیل اپریدی وايي، د تحریک انصاف ګوند او عمران خان پر وړاندې د حکومت د چلند له امله به د سپټمبر پر ۲۷مه سولهییز لاریون وکړي او هېڅوک یې له خپل اساسي او قانوني حق څخه نه شي محرومولای. هغه ویلي چې د فشارونو او ګواښونو له امله به له خپلې پرېکړې شاته نه شي.
د اسلامي همکاریو سازمان د وزیرانو د تماس ډلې په اروپا کې د مسلمانانو پر وړاندې د کرکې زیاتېدو او پر اسلامي سپېڅلو ځایونو د بریدونو له ډېرېدو اندېښنه څرګنده کړې او د مسلمانانو د حقونو د خوندي کولو غوښتنه یې کړې ده.
د ایسلنډ د بهرنیو چارو وزیرې تورګرذور کاترین ګونارسدوتیر ویلي چې د افغان ښځو او نجونو ملاتړ د دغه هېواد د بهرني سیاست له لومړیتوبونو څخه دی او ایسلنډ د «جنسیتي اپارتاید» د نړیوال قانون په چوکاټ کې د تعریف او ثبت ملاتړ کوي.
د اتریش د اساسي قانون محکمې د دوشنبې په ورځ وویل، چې په ښوونځیو کې به له ۱۴ کلونو څخه د کم عمره مسلمانو نجونو پر حجاب د نوي بندیز په اړه د راتلونکي کال په لومړۍ نیمایي کې پرېکړه وکړي.
د هرات په غوریان ولسوالۍ کې ځايي سرچینو افغانستان انټرنشنل ته وویل، چې د خالد او ادریس په نومونو د دوو ماشومانو مړي د هغوی له لادرکه کېدو څو ورځې وروسته موندل شوي. د سرچینو په وینا، دا دوه ماشومان د خپلې کورنۍ د یوه غړي د ویر د مراسمو پر مهال لادرکه شوي وو.
د بښنې نړیوال سازمان د پاکستان د پخواني لومړي وزیر عمران خان د دریو خویندو او د تحریک انصاف ګوند د فعالانو نیول غندلي دي. دغه سازمان دا نیونې د بیان ازادۍ او سولهییزو غونډو له حقونو سرغړونه بللې ده.
د طالبانو د صنعت او سوداګرۍ وزیر د بریتانیا له ځانګړي استازي سره په انلاین ناسته کې د اقتصادي اړیکو، صادراتو او له نړیوالې ټولنې سره د تعامل په اړه خبرې کړې دي. د طالبانو یاد وزارت ویلي، چې برېتانیا غواړي له افغانستان سره همکاري له بشري مرستو نه اقتصادي همکاریو ته واړوي.