د ایران رسنیو راپور ورکړی چې د پاکستان د کورنیو چارو وزیر د ایران له ولسمشر سره د تړلو دروازو ترشا یونیم ساعته خصوصي لیدنه کړې او دواړو لوریو د ایران او امریکا ترمنځ د سولې د منځګړیتوب او د خبرو د بیا پیلیدو په تړاو خبرې کړې دي.
د طالبانو د دفاع وزیر ملا یعقوب مجاهد په مشرۍ ددې ډلې د امنیتي او تصفيوي چارو مرکزي کمېسیون د مرکزي زون له امنیتي مسوولینو سره ګډه غونډه کړې ده. په دې غونډه کې د امنیتي وضعیت تر ارزونې وروسته د طالبانو د مشر د فرامینو پر بشپړې پلي کېدا ټینګار شوی دی.
د نایجریا په یوبه ایالت کې پر یوه پوځي مرکز د شکمنو اسلامي سختدریځو وسلهوالو په برید کې لږ تر لږه د پولیسو ۱۷ روزونکي افسران وژل شوي دي. وسله والو له څو خواوو پر دغه پوځي مرکز همغږی ډله ییز برید کړی دی.
په هرات کې د طالبانو د اطلاعاتو او کلتور ریاست ویلي، چې په یاد ولایت کې یې د څار او ارزونې په ترڅ کې ۱۵ سیاحتي، زیارتي او درملیز شرکتونه د کاري اصولو او مقرراتو د نه رعایتولو او د فعالیت جواز د مودې له پای ته رسېدو وروسته د غیرقانوني فعالیت له امله تړلي دي.
د طالبانو د کانونو او پټرولیم وزارت وايي، چې ددغه وزارت وزیر هدایتالله بدري ترکمنستان ته د خپل سفر په ترڅ کې د ترکمنباشي له بندر څخه لیدنه وکړه. نوموړي په دې لیدنه کې د ټاپي ګازو نللیکې پروژې د هرات برخې لپاره د اړینو تجهیزاتو او نللیکو د لېږد بهیر له نږدې څارلی دی.
په پاکستان کې مېشتو یو شمیر افغان میرمنو افغانستان انټرنشنل ته ویلې چې د اقتصادي ستونزو، د ویزو د ختمېدو، د پولیسو د چاپو، د جبري ایستلو له وېرې او نامعلوم برخلیک له امله په سختو شرایطو کې ژوند کوي. هغوی وايي، پاکستان دو ی ته په “لوی زندان” بدل شوی.
په هلمند کې د طالبانو د اطلاعاتو او کلتور رییس حافظ راشد ویلي، چې په ګرشک ولسوالۍ کې د وسلهوال مقامت پر مهال درې وسلهوال غله وژل شوي دي.
د طالبانو د بلخ والي یوسف وفا د شمال زون طالب چارواکو ته ویلي، چې د طالبانو پر ضد د منفي تبلیغاتو اجازه چاته نه ور کوي. نوموړي ویلی:« که دا تبلیغات د منبر له لارې وي، د رسنیو له لارې او یا هم په عامو مجلسونو کې وي، سرغړوونکي دې نظامي محکمې ته معرفي شي.»
د طالبانو تر واک لاندې د افغانستان برېښنا شرکت رییس عبدالحق همکار په ترکمنستان کې د یاد هېواد د انرژۍ له وزیر سره د لیدني پرمهال د برېښنايي همکاریو د پراختیا په تړاو خبرې کړې او وايي د ۵۰۰ کیلوولټه برېښنا لېږد مزي پروژې چارې په چټکۍ روانې دي.
د پاکستان د اپوزیسیون مشر او د تحریک تحفظ ایین پاکستان د اتحاد مشر محمود خان اڅکزی وايي، د پاکستان حکومت دې له عمران خان سره د دوی د لیدنې نېټه په ډاګه کړي. نوموړي د عمران خان د درملنې په اړه اندېښنه ښودلې او ویلي یې دي چې باید د کورنۍ په خوښه یې درملنه وشي.
د طالبانو اطلاعاتو او کلتور وزارت وایي، چې ددغه وزارت وزیر شیراحمد حقاني په کابل کې د قطر له سفیر مردف القاشوطي سره د افغان ځوانانو د ظرفیت لوړولو په تړاو د خپل وزارت د نویو پروګرامونو په اړه غږېدلی. حقاني د ځوانانو د ودې په برخه کې د دوستو هېوادونو همکاري مهمه بللې ده.
د طالبانو د مالیې وزارت اعلان کړی، چې پر ځینو وارداتي توکو ګمرکي تعرفې لوړې شوې دي. د یادې ډلې د تعرفې کمېټې په دویمه ناسته کې پر قالب شوې بورې او زیتون غوړیو تر ۱۰ سلنې ګمرکي تعرفه لګول شوې ده.
د طالبانو د کلیو د بیارغونې او پراختیا وزیر ملا عبداللطیف منصور په کابل کې د چین له سفیر ژاو شینګ سره د واخان سړک د لومړنیو چارو پر بشپړېدو خوښي ښودلې او د ځمکې له لارې د افغانستان او چین نښلېدل یې مهم ګڼلي دي.
د طالبانو مشر هبت الله د پروان او کاپیسا ولایتونو دیني عالمان د دې ډلې د اطلاعاتو او کلتور وزارت سره د «جهادي اثارو» په خوندي کولو کې همکارۍ ته هڅولي دي. هغه یوځل بیا ټینګار کړی، چې خلکو ته دې دده د فرمانونو ارزښت ور وښودل شي.
پنجشېر ولایت کې طالب سیمهییزو مسولینو ویلي، چې د بازارک، عنابې او ابشار سیمو کې د بیروجو کانونو رسمي استخراج پیل شوی دی.
د طالبانو د مخابراتو او معلوماتي ټکنالوژۍ وزارت ویاند عنایتالله الکوزي ویلي، چې د دغه وزارت وزیر د انټرنېټ د بندېدو په اړه له هېڅ شرکت سره خبرې نه دي کړي او په دې اړه خپاره شوي راپورونه یې بېبنسته بللي دي.
د هند د پوځ مشر جنرال اوپیندر دوېویدي پاکستان ته خبرداری ورکړی چې که د ترهګرو ملاتړ او د هند پر ضد فعالیتونه ونه دروي، نو د نړیوالې جغرافیې برخه نه بلکې د تاریخ برخه به وګرځي. په مقابل کې د پاکستان پوځ دغه څرګندونې غندلي او «غیرمسولانه او پاروونکې» یې بللې دي.
د طالبانو د روغتیا وزارت ویلي چې تیر ۱۴۰۴کال د غور ولایتي روغتون کې ۵۰۰۹بریالي جراحي عملیاتونه د متخصصو ډاکټرانو لخوا ترسره شوي دي.
د تېر جمهوري نظام د مالیې وزیر ډاکټر عمر زاخېلوال وایي، په کابل کې یې د افغانستان لپاره د جاپان له سفیر ماساموتو کینيچي سره د هېواد پر روان ټولنیز او اقتصادي وضعیت خبرې کړې او د جاپان له بشري مرستو او د اقتصادي ثبات له ملاتړ یې ستاینه کړې ده.
د طالبانو کورنیو چارو وزارت وایي، چې په غزني، بغلان او هلمند ولایتونو کې د جلا جلا عملیاتو پر مهال ۱۵ تنه د بېلابېلو جنایي جرمونو په تړاو نیول شوي دي.
د طالبانو امر بالمعروف وزیرمحمد خالد حنفي، د دغه وزارت له مسولینو سره په یوې غونډه کې ټینګار کړی چې د طالبانو د مشر هبتالله اخندزاده فرمانونو ته مکلف دي. نوموړي ادعا کړې چې د دوی د مشر ټول فرمانونه شرعي بنسټ لري.