د هرات لپاره د طالبانو د رسنیو دفتر وايي، د دغه ولایت د صنعتي تولیداتو صادرات بهرنیو هېوادونو ته په تېره یوه میاشت کې ۹۷ سلنه زیات شوي دي. دغه دفتر زیاتوي، چې په دې موده کې د کرنې او مالدارۍ ۴۱ ډوله محصولات هم بهرنیو هېوادونو ته صادر شوي دي.
د امریکا ولسمشر ډونالډ ټرمپ یو ځل بیا د اسراییل د لومړي وزیر بنیامین نتنیاهو ملاتړ کړی او د دغه هېواد له خلکو یې غوښتي چې په ټاکنو کې هغه ته رایه ورکړي، څو د ایران د اسلامي جمهوریت پر ضد پیل شوي ګډ پوځي عملیات بشپړ کړي.
د پاکستان د انټرنېټي جرمونو د پلټنو ادارې څلور کسان د ماشومانو د جنسي ځورونې د ویډیوګانو د جوړولو، ګواښلو او د دغو ویډیوګانو په پاکستان او بهرنیو هېوادونو کې د پلورلو په تور نیولي دي. چارواکي وايي، دغه ډلې به له شپږو تر څوارلسو کلونو پورې عمر لرونکي ماشومان په نښه کول.
د ملګرو ملتونو د بشري مرستو د همغږۍ دفتر (اوچا) وايي، د ښځینه کارکوونکو پر فعالیتونو محدودیتونه او د مرستندویه فعالیتونو په چارو کې لاسوهنې په افغانستان کې اړمنو خلکو ته د بشري مرستو رسونه له خنډونو سره مخ کوي.
د طالبانو د اطلاعاتو او فرهنګ وزارت مرستیال، له خپلو کارکوونکو غوښتي، چې د خپلې ۲۰ کلنې جګړې د تاریخ او اثارو له خوندي کولو او ځلولو سره هڅه وکړي، چې دا جګړه «جهاد» ثابت کړي. د طالبانو مشر، په دې تړاو یوه ځانګړې اداره له پراخو امکاناتو سره جوړه کړې ده.
د اسراییل لومړي وزیر بنیامین نتنیاهو ویلي، چې د ده په وینا، د «ایران پر محور» د بریا بشپړولو ته ډېر واټن نه دی پاتې.
د خیبر پښتونخوا والي فیصل کریم کنډي ویلي، پخوانی اعلی وزیر سهیل اپریدی او د ایالتي اسمبلۍ مشر بابر سلیم سواتی نظر بند او خوندي دي. هغه ویلي، که د دوی پر ضد قضیې نه وي نو خوشې به شي.
د امریکا د ټکساس ایالت په هیوسټن ښار کې مېشتې د افغان ترکانو ټولنې د ازبکي ژبې ملي ورځ د یوې غونډې په جوړولو سره نمانځلې ده. دغه مراسم د مورنۍ ژبې د ساتنې او د ازبکي ادب او کلتور د میراث د خوندي کولو په موخه جوړ شوي وو.
د بشري حقونو بنسټ (اېچاراېف) د پاکستان له حکومت څخه د بلوڅانو د حقونو د فعالې ماهرنګ بلوڅ د خوشې کېدو غوښتنه کړې او د هغې د قضیې په تړاو یې د عدالت غوښتنې، د بیان د ازادۍ او د جبري ورکېدو د قربانیانو د کورنیو پر وضعیت ټینګار کړی دی.
د خیبر پښتونخوا پخواني اعلی وزیر پروېز خټک ادعا کړې چې د پاکستان تحریک انصاف ګوند غوښتل د ټيټيپي او افغانستان اطاعت او ملاتړ وکړي. نوموړي د پښتونخوا د والي فیصل کریم کنډي سره تر لیدنې وروسته ویلي، د ایالتي حکومت د ختمېدو مسوولیت خپله د تحریک انصاف ګوند پر غاړه دی.
د پاکستان د پارلماني چارو وزیر طارق فضل چودري له افغان خاورې د دوی پر ضد د بریدونو له ادعا سره خبرداری ورکړی، چې که دا بریدونه پای ته ونه رسیږي، پر ضد به یې ګام واخلي. هغه دغه راز ویلي، چې په دې اړه یې د دوحې او ترکیې په ناستو کې د افغان طالبانو ته اسناد هم ښودلي.
د ایران د بهرنیو چارو وزارت ویاند اسماعیل بقایي ویلي، چې امریکا لا هم پر خپلو یو اړخیزو غوښتنو ټینګار کوي. هغه زیاته کړه چې د ایران خلک او حکومت هر ډول احتمالي سناریو او دفاع ته بشپړ چمتووالی لري.
سعودي اعلان کړی، چې د ګوزڼ ناروغۍ پر وړاندې د خوندیتوب لپاره یې تېر کال د روغتیا نړیوال سازمان او یونیسف سره د ۵۰۰ میلیونه ډالرو په ارزښت هوکړهلیکونه لاسلیک کړي. د لومړي هوکړهلیک ۳۰۰ میلیونه ډالر به په لوړ خطر لرونکو هېوادونو، په ځانګړې توګه افغانستان او پاکستان کې ولګول شي.
د کندهار پوهنتون مطبوعاتي مسوول ویلي، چې د طالبانو یو شمېر لوړپوړو « شیخانو» د دغه پوهنتون زرګونه محصلانو ته د ګناهونو د زیانونو او له « اسلامي نظام» څخه د وتلو د پایلو په اړه اوونیز لیکچرونه ورکړي. د طالبانو د سترې محکمې مرستیال هم د دغو لیکچرونو لپاره کندهار ته تللی و.
د ننګرهار د شېرزادو ولسوالۍ په ګندمک سیمه کې د یوې زړې ناچاودې مرمۍ د چاودنې له امله یو ۱۲ کلن ماشوم وژل شوی دی. د ماین پاکۍ د هڅو کمښت او په افغانستان کې د بېوزلۍ شدت د داسې پېښو له اصلي لاملونو ګڼل کیږي.
نن شپه په لسو بجو او ۱۴ دقیقو یوې نسبتاً سختې زلزلې ( د ریښتر په کچه ۵،۲ درجې) کابل او د افغانستان یو شمېر نور ولایتونه لړزولي. د زلزلې مرکز د بدخشان د اشکاشم ولسوالۍ په ۵۹ کیلومترۍ کې ښودل شوی. تراوسه د کوم زیان راپور نشته.
د یمن حوثي ډلې اعلان کړی چې د یکشنبې په ورځ، د لړم پر درېیمه، یې د سعودي عربستان پر ضد درې پوځي عملیات ترسره کړي او په لسګونو بالستیک توغندي یې د دغه هېواد پر هوايي ډګر او دوو پوځي اډو توغولي دي.
د بامیان ولایت طالب والي د یونسکو د تخنیکي پلاوي سره په لیدنه کې ټینګار کړی، چې د تاریخي سیمو د ساتنې په ګډون ټولو هڅو کې باید د دوی د « اسلامي نظام» اصول او حکمونه په پام کې ونیول شي، خو دا روښانه نه ده، چې له دې « اصولو» د طالبانو څرګنده موخه څه ده؟.
د ازاد کشمیر په مرکز، مظفراباد کې ژورې درې ته د یوه جیپ ډوله موټر د لوېدلو له امله اووه کسان مړه شوي دي. د مړه شویو کسانو په ډله کې ښځې او ماشومان هم شامل دي.
طالبانو خپلو لوړپوړو حکومتي کارکوونکو ته د خپل مشر هبتالله اخوندزاده د «اهل السنة والجماعة عقیده» کتاب تدریس پیل کړی دی. په داسې حال کې چې افغانستان له پراخ اقتصادي او بشري ناورین سره مخ دی، طالبانو په ګڼو ادارو او سیمو کې ورته پروګرامونه پيل کړي،
د طالبانو مخالفه وسلهواله ډله، متحده جبهه ادعا کوي چې د کندهار په ډنډ ولسوالۍ کې یې د طالبانو د استخباراتو یو غړی وژلی دی. دغې جبهې په خپره کړې خبرپاڼه کې د هېواد په بېلابېلو سیمو کې د طالبانو پر ضد د خپلو عملیاتو پر دوام ټینګار هم کړی دی.