طالبانو خپلو لوړپوړو حکومتي کارکوونکو ته د خپل مشر هبتالله اخوندزاده د «اهل السنة والجماعة عقیده» کتاب تدریس پیل کړی دی. په داسې حال کې چې افغانستان له پراخ اقتصادي او بشري ناورین سره مخ دی، طالبانو په ګڼو ادارو او سیمو کې ورته پروګرامونه پيل کړي،
د طالبانو مخالفه وسلهواله ډله، متحده جبهه ادعا کوي چې د کندهار په ډنډ ولسوالۍ کې یې د طالبانو د استخباراتو یو غړی وژلی دی. دغې جبهې په خپره کړې خبرپاڼه کې د هېواد په بېلابېلو سیمو کې د طالبانو پر ضد د خپلو عملیاتو پر دوام ټینګار هم کړی دی.
د پاکستان د پوځ د عامه اړیکو څانګه وايي، چې د خیبر پښتونخوا په ډېره اسماعیل خان کې د پوځې عملیاتو پر مهال د دوی دوه پوځیان وژل شوي دي. پاکستاني پوځ په یادو عملیاتو کې د شپږو وسلهوالو د وژلو ادعا هم کړې ده.
د افغانستان د پنځلس کلنو کم عمره فوټبال ملي لوبډلې د فیفا په نړۍوال فیستیوال کې خپله دویمه لوبه له جیبوټي هېواد څخه د درې پر دوه ګولونو په توپیر وګټله. په دغه لوبه کې د افغانستان لپاره رامین سلطاني، شهزاده سلطاني او خیر محمد نظري یو -یو ګول وواهه.
د سریلانکا د بهرنیو چارو وزارت یوه ویاند د یکشنبې په ورځ وویل، چې دغه هېواد خپلې ساحلي سیمې ته نږدې په نړیوالو اوبو کې له څو سوداګریزو بېړیو څخه د ۴۰ ایراني سمندري کارکوونکو د ژغورلو چارې همغږې کړې او ایران ته یې د هغوی د بېرته ستنېدو په برخه کې مرسته کړې ده.
د طالبانو د ۲۰۱ خالد بن ولید قول اردو ویاند ویلي چې د ننګرهار په پچیراګام او شیرزاد ولسوالیو کې یې له پاکستان نه قاچاق کېدونکي ۱۷۷ څاروي او درمل نیولي دي.
یو شمېر افغان پناهغوښتونکي د ایران او ترکیې پر پوله، د ترکیې په چالدران سیمه کې د دغه هېواد سرحدي ځواکونه په شکنجې، وهلو ټکولو او ناوړه چلند تورنوي. دوی وايي، ځینې افغانان تر څو اونیو بند او جبري کار وروسته، له ټپونو سره بېرته ایران ته شړل شوي دي.
د سیمهییزو چارواکو په وینا، د اوکراین یوه ډرون د شپې له خوا د روسیې پر سرحدي ښار بلګورود برید کړی، چې له امله یې درې کسان وژل شوي او ۱۳ نور ټپیان شوي دي. د یکشنبې په ورځ، د دغه ښار یوه نږدې کلي کې په جلا ډرون برید کې هم یو کس وژل شوی او بل ټپي شوی دی.
د ارزګان ولایت د پخواني امنیه قوماندان جنرال مطیع الله خان کورنۍ ته نږدې کسانو افغانستان انټرنشنل ته وویل، چې د دوي په کور کې هېڅ وسلې نه دي موندل شوې او د طالبانو د ارزګان ولایت د امنیه قوماندانۍ ادعا ناسمه ده.
د روسیې د دفاع وزارت وايي، ځواکونو یې د تور سمندرګي د چورنومورسک او اودېسا بندرونو پر لور روانې دوې باروړونکې بېړۍ او د اوکراین په خارکیف ښار کې درې لوژستیکي مرکزونه په نښه کړي دي.
د بدخشان په شهر بزرګ ولسوالۍ کې د یوه واده په مراسمو کې د موسیقۍ او پټاکیو د مخنیوي لپاره د طالبانو د ځواکونو له مداخلې وروسته نښته شوې چې له امله یې یو طالب وژل شوی او د دوو طالبانو په ګډون څلور کسان ټپیان شوي دي.
طالبانو په بادغیس ولایت کې د هبت الله د فرمانونو د حفظ لپاره د محصلانو ترمنځ د یوې سیالۍ د ترسره کېدو خبر ورکړی دی. په بادغیس کې د طالبانو د والي د دفتر ویلي، چې ۹۴ محصلان د ګټونکو په توګه اعلان شول. له دې وړاندې طالبانو د امارت پېژندنې د سیالۍ یوه لړۍ پیل کړې وه.
د ملګرو ملتونو د ماشومانو د ملاتړ صندوق (یونېسف) وايي، د ازبکستان د ترمز له لارې به افغانستان ته د ژوند ژغورونکو بشري مرستو او اړینو درملو لېږد ته دوام ورکړي. د دغې ادارې یوه مشر د ۳،۷ میلیونه خوارځواکۍ ځپلو افغان ماشومانو پر ملاتړ ټینګار کړی.
د طالبانو د پنجشېر ولایت چارواکي وايي، دیاد ولایت زمرد به د لومړي ځل لپاره په کابل کې د کانونو په نندارتون کې لیلام ته وړاندې شي. د یادو چارواکو په وینا، د زمردو د کیندنې درې شرکتونه به په دې لیلام کې ګډون وکړي او د پنجشېر ګران بیه او نیمهګرانبیه ډبرې به نندارې ته وړاندي کړي.
د طالبانو د چاپېریال ساتنې ادارې رییس د ملګرو ملتونو د خوړو او کرنې سازمان له چارواکو سره په لیدنه کې ویلي، چې د افغانستان چاپېریال د اقلیمي بدلونونو له اغېزو سخت اغېزمن شوی. هغه په دې برخه کې د جدي هڅو او د خپلو کارکوونکو د مسلکي روزنې غوښتنه کړې ده.
په خوست کې د طالبانو د والي دفتر وايي، چې سږ کال د خوست د املوکو حاصل د تېر کال په پرتله نږدې ۱۰ سلنه زیات شوی دی. ځایي کروندګر بیا وایي خلک د اقتصادي ستونزو له امله ډېر املوک نه پېري او د سوداګریزو لارو تړل کېدو یې بهر ته د حاصل د لېږد مخه نیولې ده.
د طالبانو د ریاست الوزرا د اقتصادي مرستیال عبدالغني برادر دفتر ویلي، چې د نوموړي په مشرۍ د تدارکاتو کمېسیون په غونډه کې د شاخوا پنځه میلیارده افغانیو په ارزښت ۱۷ پروژې منظورې شوې دي.
د طالبانو د پکتیا والي عبدالخالق عابد په ګردېز ښار کې په یوه غونډه کې له سوداګرو غوښتي، چې له ګاونډیو هېوادونو له راستنو شویو افغان کډوالو سره مرسته وکړي. په غونډه کې له کډوالو سره د مرستو په تړاو د مولوي هبت الله «نوې کړنلاره» هم تشریح شوې ده.
طالبانو د نیمروز ولایت په لومړۍ امنیتي حوزه کې د لسګونو کسانو د قاچاق د مخنیوي خبر ورکړی او وايي، د قاچاق وړونکو یو پټنځای یې هم موندلی. طالبانو دا نه ده روښانه کړې، چې دغه کسان کوم هېواد ته قاچاق کېدل، خو دې ډلې په دې وروستیو کې ایران ته د انساني قاچاق پر مخنیوي تمرکز ډېر کړی.
په ارزګان کې د طالبانو امنیه قوماندانۍ په ضمني ډول منلې، چې د جنرال مطیع الله خان پر کور یې چاپه وهلې ده. افغانستان انټرنشنل د شنبې په ورځ د خپلو سرچینو له قوله راپور ور کړی و، چې طالبانو د دغه ولایت د پخواني امنیه قومندان پر کور چاپه وهلې او کېندنې یې پکې کړې دي.
د طالبانو د کار او ټولنیزو چارو وزارت وايي، هغه کسان چې د کارموندنې او بهر ته د کارګرانو د لېږلو په پلمه پیسې ترې اخیستل شوې، خو د لېږد چارې یې نه دي بشپړې شوې، له شکایتونو ثبتولو وروسته یې د پیسو په بېرته ترلاسه کولو کې مرسته کوي.