د هرات ولایت یوشمېر اوسېدونکو د سېشنبې په شپه افغانستان انټرنشنل ته ویلي، چې دوی بېګاه شپه وایفای انټرنېټ ته لاسرسی نه لاره. دوی وايي، چې د شپې له لسو بجو وروسته طالبانو د انټرنېټ خدمتونه بند کړي دي.
په هرات کې سرچینې وايي چې د طالبانو د لوړو زده کړو وزیر ددغه ولایت په دولتي پوهنتون کې د وینا پرمهال محصلانو ته سپارښتنه وکړه چې ځېرک ټیلیفونونه ونه کاروي. ندیم ویلي، چې «موږ درې اصلي دښمنان لرو چې کافران، منافقان او ګرځند ټیلیفونونو والا دي».
په هرات کې د انټرنېټي خدمتونو وړاندې کوونکو شرکتونو د طالبانو په امر بېګاه شپه له ۸ بجو څخه د سېشنبې سهار تر اتو بجو پورې ټول انټرنېتي خدمتونه بند کړي و.
د افغانستان انټرنشنل-پښتو سرچینې وایي، په هېواد کې د طالبانو د مشر په امر د نوري فایبر انټرنېټ په بندېدو سره له ګمرکونو او دولتي بانکونو سربېره، سوداګریز خصوصي بانکونه له ستونزو سره مخ شوي او تازه د هېواد په درېیو سوېلي ولایتونو کې بانکونه فلج شوي او هېڅ راکړه ورکړه نه لري.
د افغانستان په یو شمېر ولایتونو کې د طالبانو د مشر ملاهبت الله له لوري د نوري فایبر انټرنېټ له بندېدو سره هممهاله د دغې ډلې د ویاند ذبیح الله مجاهد هغه ویډیو په خواله رسنیو کې لاس په لاس کېږي، چې نوموړی په کې دوه کاله وړاندې د دغه کېبلي انټرنېټ په ستاینو بوخت دی.
د طالبانو مشر هبــت الله اخـوندزاده ته نږدې سرچینې وايي چې هغه د نوري فایبر انټرنېټ پر بندولو سربېره، په خپل استوګنځي او شاوخوا کې د هر ډول سمارټ فون او عادي ټیلیفونونو کارول هم منع کړي دي. سرچینې وايي، نوموړی د اړیکو لپاره له مخابرې کار اخلي.
د افغانستان د ښځو د حقونو د مدافعانو او بشري حقونو فعالانو ۱۱۳ مدني بنسټونو، په یوه ګډه اعلامیه کې د طالبانو له خوا د انټرنېټ د محدودولو پرېکړه «د بیان د ازادۍ ښکاره سرغړونه» بللې او له نړیوالې ټولنې یې غوښتي چې پر دې ډلېې د فشار راوړلو لپاره بېړني اقدامات ترسره وکړي.