اوزبیکستان ۴۰۰ تُن کمک بشردوستانه به افغانستان ارسال کرد

یوسف وفا، والی بلخ، گفته است که ارسال این کمک‌ها از سوی اوزبیکستان نشان‌دهنده روابط خوب میان طالبان و این کشور است و افزود که این کمک‌ها زمانی به افغانستان رسیده که نیازهای بشردوستانه همچنان ادامه دارد.

این کمک‌ها شامل آرد، برنج، قوطی کنسرو گوشت گاو، شکر، روغن، ماکارونی، دارو و تجهیزات طبی است.

والی بلخ همچنان گفت که پس از بسته‌شدن مسیرهای تجارتی با پاکستان، شماری از تاجران غرب و جنوب افغانستان از این مسیر برای صادرات و واردات استفاده می‌کنند.

عصمت‌الله ایرگاشف، نماینده ویژه رئیس‌جمهور ازبیکستان گفت این کمک‌ها به تصمیم شوکت میرضیایوف، رئیس‌جمهور ازبیکستان، به مردم افغانستان ارسال شده و هدف آن تقویت «روابط حسن همجواری» با افغانستان است. او تاکید کرده است که این کمک‌ها در چارچوب تعهدهای بشردوستانه اوزبیکستان انجام شده است.

مقام‌های اوزبیکستانی گفته‌اند که از سال ۱۴۰۰ تا کنون، بیش از ۱۵ هزار تُن کمک بشردوستانه از سوی جمهوری اوزبیکستان به افغانستان ارسال شده است.