”ای زما وطنه غواړمه بخښه”، ”ګران دی وطن” او ”زما درې رنګه بېرغه” درې جلا، جلا سندرې د درېیو جلا وطنه سندرغاړو په ژبه. مېرمن نغمې، ګودر ځاځي او میرخان مقري درې جلا، جلا سندرې د خپلواکۍ ورځې د لمانځلو لپاره خپرې کړې دي.
نن د شنبې ورځ د( زمري ۲۸ مه) د افغانستان د خپلواکۍ ۱۰۴ مه کلیزه ده.
مېرمن نغمه، ګودر ځاځی او میرخان مقری چې درې سره یې له افغانستانه بهر په جلا وطنۍ کې ژوند کوي د افغانستان د خپلواکۍ د بېرته اخیستلو د ۱۰۴ مې کلیزې په مناسبت تازه جوړې شوې سندرې خپرې کړې دي.
ګودر ځاځي د ”ای زما وطنه غواړمه بخښنه”، سندره کې د افغانستان د ناخوالو او ځانګړنو صفت په زمزمه کې کړی.
ګودر ځاځی وايي:« موسیقي د افکارو په تولید کې ډېر مهم، ګټور او علمي حیثیت لري، په همدې اساس د سندرې له لارې خلکو ته د داسې افکارو ورکول د حالاتو جدي تقاضا او د بخښنې غوښتنه له شخصیتي اړخه موږ لا پیاوړي کوي.»
د دغې سندرې په اړه ګودر ځاځي افغانستان انټرنشنل ته وویل:« دا سندره چې ”ای زما وطنه، غواړمه بخښنه” نومیږي، زموږ د مسوولیت منلو حس غښتلی کوي او د دې پر ځای چې یو بل ملامت وګڼو ښه به دا وي، چې بالاخره یو داسې پړاو ته ورسیږو چې له مور له وطن څخه د بخښنې غوښتلو اخلاقي جرائت پیدا کړو.»
سندرغاړی ګودر ځاځی هیله لري، چې د هېواد سیاسي مشران دا سندره واوري او له افغانستانه بخښنه وغواړي چې بیا له وطن سره د جفا د نه کولو ژمنتیا دوامداره شي.
همدارنګه د افغانستان یو بل ځوان سندر غاړي میر خان مقري هم د ازادۍ د ۱۰۴ مې کلیزې لپاره د ” ګران وطن“ په نوم سندره ویلې او د (زمري په ۲۸ مه) یې خپره کړه.
نوموړی وايي: «دا سندره مې د غازي امان الله خان د نیکو کړنو درناوي په پار ویلې ده، ځکه هغه په ډېر ستونزمن حالت کې د افغانستان خپلواکي تر لاسه کړې ده.»
میر خان مقری د یادې سندرې په اړه وايي:« خلکو ته بیا هم ور په یادوم، چې د دې خاورې او وطن اصلي څښتنان موږ یو. دا وطن زموږ دی، په دې سندره کې مې د هېواد د ښایست او غرونو رغونو ستاېنه کړې، چې هر چاته خپل کور او کلی ور په یاد کړم، که هر څومره سختې راځي؛ خو بیا هم دا وطن موږ ته را پاتې کېږي.»
میر خان مقری وايي، باور لرم چې په سندرو کې د هېواد د ښکلا ګانو او د خپلواکۍ په زمزمو ویلو سره به خلک دا سندرې ډېرې خوښې کړي.
په دې لړ کې د افغانستان د خپلواکۍ د ورځې په مناسبت د افغانستان مشهورې سندرغاړې مېرمن نغمې هم د ”زما درې رنګه بېرغه” سندره ویلې ده.
مېرمن نغمې په دغه سندره کې د افغانستان د درې رنګه ملي بېرغ په څېر، ملي جامې اغوستي او په خپل جاودیې غږ سره د ملي بېرغ سندره زمزمه کوي.
د یادونې وړ ده، چې په تېرو کلونو کې به د افغانستان د ازادۍ ورځ د پخواني جمهوري حکومت له لورې په خورا شانداره مراسمو لمانځل کېده او د هېواد په هره برخه کې به خلکو د ازادۍ او شاه امان الله خان د کارنامو او ویاړونو ستاینه کوله؛ خو پر افغانستان د طالبانو د واکمنېدو وروسته په تېرو دوو کلونو کې د خپلواکۍ د ورځې لمانځل په محدود ډول د طالب چارواکو له لورې په داسې حال کې لمانځل کېږي، چې د افغانستان پر درې رنګه بېرغ او د شاه امان الله خان پر انځورو بندیز لګول شوی دی.
