د سند والي وايي د ناقانونه افغانانو د نیولو لړۍ چټکوو؛ بل خوا پولیسو ۳۲۹ افغانان نیولي دي
راپورونه وايي، چې د پاکستان د سند صوبې په کراچۍ ښار کې د افغان کډوالو د نیولو لړۍ یو ځل بیا چټکه شوې او په تېرو پنځو ورځو کې یې نېږدې ۳۲۹ افغانان نیولي دي.
د سند والي (ګورنر) کامران ټیسوري هم تېره ورځ (د وږي ۲۱مه) ویلي، چې په سند کې یو شمېر افغانان په قاچاقو کې لاس لري او دوی پلان لري چې د افغانانو د نیولو لپاره روان عملیات لا ګړندي کړي.
نوموړی وايي، چې د پاکستان له لومړي وزیر سره یې په دې اړه خبرې هم کړي او هڅه کوي، چې په غېرقانوني کړنو کې ښکېل افغانان ونیسي.
د هغه په خبره؛ پرېکړه یې کړې، چې د قانوني اسنادو نه لرونکي به نیسي او بېرته به یې افغانستان ته لېږي.
په ورته وخت کې جیونیوز د کراچۍ د پولیسو په حواله خبر ورکړی، چې په تېرو پنځو ورځو کې یې په کراچۍ کې ۳۲۹ افغانان نیولي او د نورو په نیولو پسې پلټنې روانې دي.
خبر زیاتوي، چې په کراچۍ کې نیول شوي ټول افغانان غیر قانوني مېشت کډوال وو، چې له قانوني کړنو وروسته به طالبانو ته سپارل کیږي.
د رسمي معلوماتو له مخې؛ تر دې مهاله له پاکستاني زندانونو څخه نېږدې ۲۵۰۰ افغان زندانیان خوشې شوي دي.
خو په پاکستان کې د کډوالو چارو یو شمېر فعالان بیا وايي، چې اکثره نیول شوي کډوال د کډوالۍ رسمي اسناد هم لري خو بیا هم د پولیسو له خوا نیول شوي دي.
د طالبانو د بیا واک ته له رسېدو سره سم په پاکستان کې بریدونه زیات شوي،چې په اړه یې ګڼو پاکستاني چارواکو ادعاوې کړي، چې ترهګریز بریدونه له افغانستان پلانیږي.
خو طالبانو په وار – وار د پاکستاني چارواکو ادعاوې رد کړي او دا یې د هغوی د امنیتي ځواکونو ناکامي بللې ده.
