چین د ایفون په پېرلو او کارولو د بندیز په اړه راپورونه رد کړل
د چین د بهرنیو چارو وزارت په یو شمېر دولتي ادارو او کمپنیو کې د ایفونونو په پېرلو او کارولو د بندیز په اړه راپورونه رد کړل او ویې ویل، چې داسې کوم بندیز نه دی لګېدلی.
رویټرز په دې وروستیو کې راپور ورکړی و، چې چین پر حکومتي کارکوونکو د ایفون د کارولو محدودیتونه زیات کړي دي.
د دغه راپور له مخې، د ځینو دولتي ادارو کارکوونکو ته ویل شوي چې د کار پر مهال د خپلو اپل ټیلیفونونو له کارولو ډډه وکړي.
دغه خبر د اپل پانګهوالو د اندېښنې لامل شو، ځکه چین د نړۍ دویم ستر اقتصادي طاقت دی او د دغې امریکایي شرکت لپاره لوی بازار ګڼل کېږي؛ خو د چهارشنبې په ورځ د چین د بهرنیو چارو وزارت دغه راپورونه بې بنسټه وباله.
د دغو راپورونو د ځواب په اړه د چین د بهرنیو چارو وزارت ویاند مائو نېنګ په یوه خبري کنفرانس کې وویل: "چین داسې کوم قانون، مقررات یا پالیسي نه ده صادره کړې، چې د اپل په څېر د بهرنیو ټلیفونونو پېر او کارول منعه کړي."
نوموړي زیاته کړه، چې په چین کې د ګرځنده ټیلیفون ټول شرکتونه باید د مقرراتو سره سم عمل وکړي.
په چین کې د ایفونونو په پېر او کارولو د بندیز راپورونه په داسې حال خپریږي، چې د بیجېنګ او واشنګټن تر منځ اړیکې ترینګلې شوې او که دا مسله رښتیا وي نو د اپل شرکت لپاره به دا لویه ننګونه وي، ځکه د عایداتو د ترلاسه کولو لپاره په چین پورې خورا تړلې ده.
