د پاکستان د بهرنیو چارو وزارت ویاندې د دوشنبې په ورځ د انټرسېپټ ویب پاڼې هغه راپور رد کړ چې وایي، اسلاماباد هوکړه کړې چې د پیسو له نړۍوال صندوقه د پور په بدل کې اوکراین ته وسلې ورکوي.
ممتاز بلوچ دغه ادعا "بې بنسټه او افسانه" وبلله.
انټرسپېټ وېبپاڼې د یکشنبې په ورځ په یوه مفصل راپور کې ادعا کړې، چې دوو باوري سرچینو د دغه تړون په اړه د امریکا او پاکستان د حکومتونو محرم اسناد لیدلي دي.
د دغې وېبپاڼې د مالوماتو له مخې، د دغه تړون په بدل کې واشنګټن له پاکستان سره د پور اخیستو په برخه کې مرسته کړې ده.
د پیسو نړۍوال صندوق چې متحده ایالات په کې ډېر نفوذ لري، د چنګاښ میاشتې په ۲۱مه پاکستان ته د درې میلیارد ډالرو د مالي ژغورنې کڅوړه تصویب کړه، چې ټاکل شوې شاوخوا ۱،۲ ملیارد ډالره باید سمدستي ورکړل شي.
پاکستان چې د چین په ګډون د خپلو بهرنیو پورونو د ورکړې لپاره د بهرنیو اسعارو له سخت کمښت سره مخ و، د پیسو د نړۍوال صندوق دغې مرستې ته یې اړتیا درلوده.
دا پیسې به په پاکستان کې د ویجاړونکو سېلابونو او غلطو مالي پالیسیو په څېر ننګونو سره د مبارزې لپاره وکارول شي، کوم چې د لوی مالي کسر، د پيسو د پړسوب د زیاتوالي او د بهرنیو اسعارو د کمېدو لامل شوی.
مېرمن بلوچ د دوشنبې په ورځ یو ځل بیا د اوکراین په جګړه کې د پاکستان پر بې پرې توب ټینګار وکړ.
نوموړې وويل: "د پيسو له نړۍوال صندوق سره په پاکستان کې د ستونزمنو؛ خو ضروري اقتصادي اصلاحاتو د ترسره کولو لپاره د برياليو خبرو اترو وروسته هوکړه وشوه، د دغو خبرو بل هر ډول تعبیر حقیقت نه لري.»
د پاکستان د بهرنیو چارو د وزارت ویاندې ویلي، چې پاکستان د بې پرې توب له امله روسیې او اوکراین ته وسلې او مهمات نه ورکوي.
تر دې مخکې هندي رسنیو له پاکستانه اوکراین ته د درېیم هېواد له لارې د وسلو د لېږلو په اړه هم یو راپور خپور کړی و؛ خو د اوکراين او پاکستان حکومتونو دا خبر رد کړی و.
د اوکرایین د بهرنیو چارو وزیر د جولای په میاشت کې پاکستان ته د سفر پر مهال وویل، چې د کییف او اسلاماباد ترمنځ د وسلو د خرڅلاو په اړه کوم تړون نه شته.