د پاکستان د بهرنیو چارو موقت وزیر وايي، چې پر هېواد یې د تحریک طالبان پاکستان لخوا بریدونه د پاکستان او افغانستان ترمنځ د دښمنۍ په هدف ترسره کیږي.
جلیل عباس جیلاني د خواشیني په څرګندولو وویل، چې «په پاکستان کې دننه بریدونه اوس هم له افغانستانه ترسره کیږي.»
هغه چې د ملګرو ملتونو په عمومي غونډه کې د ګډون لپاره نیویارک ته تللی، د پنجشنبې په ورځ (د وږي په ۳۰مه) ټي ار ټي خبري شبکې ته وویل، چې له افغانستانه پر دغه هېواد د تحریک طالبان پاکستان بریدونه د اسلام اباد لپاره لویه اندېښنه ده.
نوموړي خبرداری ورکړ، چې تحریک طالبان پاکستان د دواړو هېوادونو ترمنځ ډېره دښمني رامنځته کولای شي.
د پاکستان د بهرنیو چارو وزارت سرپرست زیاته کړه، چې اسلام اباد غواړي افغانستان ته د یوه باثباته هېواد په سترګه وګوري، خو دی په دې باور دی چې د تحریک طالبان پاکستان او د داعش د خراسان څانګې په ګډون ګڼ شمېر ترهګرې ډلې په افغانستان کې شتون لري.
جلیل عباس جیلاني ټینګار وکړ، چې دا نه یوازې د پاکستان بلکې د سیمې د نورو هیوادونو لپاره هم جدي اندیښنه ده.
په ورته وخت کې نوموړي څرګنده کړه، چې پاکستان له افغان طالبانو سره خبرې کوي او دغې ډلې ته ویل شوي، چې له پاکستان او نړۍوالې ټولنې سره د شویو ژمنو له مخې باید اجازه ورنه کړي، چې د افغانستان خاوره د نورو هېوادونو پر ضد وکارول شي.
د افغانستان په چارو کې د پاکستان استازی اصف درانی نن (پنجشنبې د وږي ۳۰مه) د یوه پلاوي په مشرۍ کابل ته راغی.