د چين ولسمشر شي جن پينګ د سوريې له ولسمشر بشار الاسد سره په کتنه کې وويل، د «ستراتيژيکو همکاريو» کچې ته د دواړو هېوادونو د اړیکو لوړېدل به د سوريې د بيارغونې او د کورنۍ ناکرارۍ په له منځه وړلو کې مرسته وکړي.
چین ته د بشارالاسد سفر نړیوال ډګر ته د سوریې د ستنیدو په برخه کې د یو مهم بدلون په توګه کتل کېږي.
د چین او سوریې ولسمشرانو د جمعې په ورځ د چین په هانګزو ښار کې سره وکتل.
ډیری په دې باور دي چې د چین او سوریې اړیکې شي جن پینګ ته اجازه ورکوي چې په منځني ختیځ کې د چین ستراتیژیکو ګټو ته وده ورکړي، چې لا دمخه له ایران او سعودي عربستان سره ښه همغږي لري.
د چین په ډیپلوماسۍ کې، «ستراتیژیک مشارکت» په سیمه ییزو، نړیوالو چارو او پوځي برخو کې د نږدې همغږۍ معنا لري.
دا ډول همکاري د هغه څه څخه یو ګام ټيټه ده چې بیجینګ ورته «هر اړخیز ستراتیژیک شراکت» وایي.
په ۲۰۱۱میلادي کال کې د سوریې د کورنۍ جګړې له پیل سره، د بشارالاسد د پوځ له خوا د مظاهره چیانو د ځپلو له امله، لوېدیځو هېوادونو د سوریې پر حکومت سخت بندیزونه ولګول.
د ایران او روسیې په ملاتړ د بشارالاسد حکومت د سوریې پر ډېره برخه کنټرول لري او په وروستیو کلونو کې توانېدلی چې د سیمې له هغو عربي هېوادونو سره چې د مخالفینو ملاتړ کوي خپلې اړیکې قوي کړي.
همداراز، د بشارالاسد حکومت د هېواد د زیربناوو او صنایعود بیا رغولو لپاره بهرنۍ پانګونې ته اړتیا لري.
ډېری ګمان کوي چې چین به په سوریه کې د امریکا د بندیزونو او کمزوري امنیت له امله په دغه هېواد کې پانګونه ونه کړي.
میر واعظ فاروق د خپل څلور کلن کورني بند په هکله ویلي چې دا بند او له خلکو بېلتون یې تر ټولو دردونکی ژوند و.
هغه زیاته کړې چې مورال یې کمزوری شوی نه دی بلکې په خورا قوي روحیه به خپل فعالیت جاري ساتي.
نوموړي د کشمیر د کورواکۍ ختمول د هندي نېشنلېزم برخه او د نه منلو وړ بلله.
د سرینګر تاریخي او مشهور جومات جومات اداره په یوه اعلامیه کې وايي، لوړپوړي چارواکي د پنجشنبې په ورځ میر واعظ ته کورته ورغلل او ورته ویې ویل چې ستاسو د خوشي کېدو پرېکړه شوې او د جمعې په ورځ جومات ته تللی شئ.
د جمعې په ورځ د نوموړي هرکلي ته د جومات په مخ کې به سلګونو کسان ولاړ و.
میر واعظ عمر د سرینګر په تاریخي جومات کې د جمعې لمونځ کې احساستي خطبه وویله، چې له امله یې پخپله او د نورو مقتدیانو اوښکې تویې شوې.
ښاغلی فاروق د حریت کانفرنس مشر دی چې نږدې شل بېلتونپالې ډلې پکې راټولې دي.
هغه په لانجمن کشمیر کې د بېلتونپالو مظاهرو مشري کوله، خو تر نورو کشمیري مشرانو ډېر منځلاری بلل کېده.
د فاروق وکیل محکمې ته ویلي، چې موکل یې د ۲۰۱۹ کال د اګسټ پر څلورمه ونیول او بیا خپل کور کې بندي کړل شو.
د نوموړي بند له هغه وروسته و چې د هند واکمن ګوند بهارتیا جنتا د دغه هېواد د اساسي قانون ۳۷۰ ماده لرې کړه.
دې مادې جمو کشمیر ته کورواکي او خلکو ته یې د ځمکو او دندو خوندیتوب ور کړی و.
خو د مادې په لرې کېدو سره دا سیمه د هند د فدرالي حکومت واک ته ولوېده.
د هند حکومت هغه وخت ویل چې د قانون د پلي کولو لپاره یې لسګونه کشمیري مشران پر کور نظر بند کړي دي.
خو کال وروسته پر انټرنټ د بندیز لرې کېدو سره ډېری مشران خوشي شول.
کشمیر د هند، پاکستان او لږ اندازه د چین ترمنځ لانجمنه سمه ده او هر یو یې د بل تر واک لاندې پر ټوله یا ځینې برخه د حاکمیت دعوه لري.
د هند تر واک لاندې کشمیر کې د نوي ډېلي پرضد پر ۱۹۸۹ کال وسلوال مخالفت پیل شو.
هند یې پړه پر پاکستان اچوي، خو اسلام اباد دا تورونه ردوي.
د ایراني رسنیو د راپورونو له مخې، دې پوځي پرېډ یا رژه کې چې په ژوندۍ بڼه خپره شوه، د «مهاجر، شاهد او ارش» ډرون الوتکې نندارې ته وړاندې شوې.
د ایران اسلامي جمهوریت تېره میاشت ویلي وو چې د مهاجر ۱۰ په نوم یې یوه پرمختللې بې پیلوټه الوتکه جوړه کړې چې دوه زره کیلومتره واټن وهلی شي.
سربیره پردې، مهاجر ۱۰ د ۲۴ ساعتونو لپاره الوتنه کولی شي او تر ۳۰۰ کیلوګرامه کارګو لیږدوي، چې د اوسني مهاجر ۶ډرون څخه یې ظرفیت دوه چنده ډېر دی.
امریکا پر ایران تورن لګولی چې مهاجر ۶ ډرون الوتکې یې روسیې ته ورکړي چې د اوکراین په جګړه کې یې وکاروي.
واشنګټن د سې شنبې په ورځ پر ایران د بندیزونو د زیاتیدو یو لامل روسیې ته د دغو بې پیلوټه الوتکو سپارل وباله.
تهران روسیې ته د دغو بې پیلوټه الوتکو استول ردوي.
د جمعې په ورځ ایران خپل بالستیک او هایپرسونیک توغندي هم نندارې ته وړاندې کړل
د ایران او عراق جګړه د ۱۳۵۹لمریز کال د وږي په ۳۱مه (د ۱۹۸۰میلادي کال د سپتمبر ۲۲) پیل شوه او اته کاله یې دوام وکړ.
دا جګړه چې له اقتصادي پلوه ویجاړونکې وه او لږ تر لږه نیم ملیون کسان پکې ووژل شول، بالاخره د ایران له خوا د ۱۳۶۷لمریز کال د زمري په میاشت کې د ملګرو ملتونو د امنیت شورا د ۵۹۸ پریکړه لیک په منلو سره پای ته ورسیده.