ایران انټرنشنل په لندن کې بیا خپلې خپرونې پیل کړې

د ایران انټرنشنل شبکې له څو میاشتو ځنډ وروسته په لندن کې له نوې سټوډیو څخه خپلې خپرونې بیا پیل کړې. د دغې شبکې مشر محمود عنايت وويل، له لندنه د کار بيا پيلول «د دې نښه ده چې موږ به د ايران خلکو ته خپلواک او پرته له سانسوره خبرونه وړاندې کوو.»

د ایران انټرنشنل د تېر کال د کب میاشتې په ۲۹مه نېټه له تروریستي ګواښونو وروسته په لنډمهالې توګه خپلې ټلویزیوني خپرونې د لندن له دفتره واشنګټن ته ولېږدولې.
د لندن دفتر د تړلو پرېکړه وروسته له هغې وشوه چې د لندن میټروپولیټن پولیسو په یوه بیان کې اعلان وکړ چې د محمد حسین دوتاییف په نوم یو اتریشی وګړی د بریتانیا د ترهګرۍ ضد پولیسو له خوا د ایران انټرنشنل پر ودانۍ د ترهګریز برید تر سره کولو په تور ونیول شو.
د ایران انټرنشنل شبکې مدیر د فعالیتونو د بیا پیلولو په مناسبت په خپل پیغام کې، د خبریالانو او کارکونکو څخه مننه وکړه چې، «په کړکیچن وخت کې ژمن او ثابت پاتې شوي.» محمود عنايت د افغانستان انټرنشنل شبکې له خبريالانو او کارکوونکو څخه هم مننه وکړه چې په واشنګټن کې يې د ايران انټرنشنل پروګرامونو په جوړولو کې همکاري کړې ده.
هغه همداشان د لندن د میټروپولیټن پولیسو او د انګلستان د حکومته د ایران انټرنشنل د کارکوونکو د ساتنې او د لندن دفتر ته د هغوی په خوندي توګه د راستنېدو په برخه کې د دوامدارو مرستو له امله مننه وکړه.
د ایران امنیتي بنسټونو په تېره بیا د تېر کال په وږي میاشت کې د انقلابي پاڅون له پیلېدو وروسته، د ولسي اعتراضونو د رسنیز پوښښ له امله د ایران انټرنشنل شبکې په وړاندې ګواښونه زیات کړل.
دغه ګواښونه په وروستیو میاشتو کې هم روان و او د دغو ګواښونو په وروستۍ بېلګه کې د ایران حکومت د اطلاعاتو وزیر اسماعیل خطیب دغه ګواښونه تکرار کړل.
خطیب د سې شنبې په ورځ (وږي ۲۶مه) په یوه ټلویزیوني مرکه کې وویل چې د ایران حکومت به د دې شبکې پر ضد "هر وخت او هر ځای يې چې وار برابر شو" اقدام وکړي او هر ډول برید چې يې زړه و پرې وکړي.
هغه په خپله ټلویزیوني مرکه کې وویل، «د بېلابېلو هېوادونو ملاتړ به د دې لامل نه شي چې موږ له بریدونو لاس واخلو.»

نړیوال ملاتړ ته د هغه اشاره دا وه چې د ایران انټرنشنل په وړاندې د امنیتي ګواښونو د اړخونو له افشا کیدو وروسته د حکومتونو او رسنیزو بنسټونو له خوا د دغې شبکې د ملاتړ څپې رامنځته شوې.
د امریکا د بهرنیو چارو وزارت، د خبریالانو نړیوال فدراسیون او د استرالیا د رسنیو، تفریح او هنرونو اتحادیه د هغو بنسټونو له ډلې څخه وو چې د کب په میاشت کې د لندن د دفتر له جبري تړلو وروسته، د دغو ګواښونو د غندلو پر مهال يې د خبریالانو په خوندیتوب او د بیان ازادۍ پر اړتیا ټینګار وکړ.
برېتانیاوي چارواکو هم د امنیتي ګواښونو له رامنځته کېدو وروسته له ایران انټرنشنل څخه خپل پراخ ملاتړ وکړ.
د انګلستان د ملي امنیت مرستیال ټام توګنهوت په لندن کې د ایران انټرنشنل د دفتر له تړلو وروسته د دغې شبکې په وړاندې د ایران د حکومت ګواښونه په کلکه وغندل او اعلان یې وکړ چې هیواد به یې له دغې شبکې ملاتړ ته دوام ورکړي او دوی ته به د فعالیت کولو لپاره امن فضا برابروي.
تر دې مخکې، کله چې د (لړم میاشتې په ۱۶ مه ) د ایران انټرنشنل ټلویزیوني شبکې خپلو خبریالانو ته د ایران سپاه پاسداران له لوري د لویو ګواښونو خبر ورکړ، د بریتانیا د بهرنیو چارو وزیر جیمز کلیورلي په لندن کې د ایران سفیر مهدي حسیني متین احضار کړ.
د ایران اسلامي جمهوریت د سفیر له احضارولو وروسته په یوه وینا کې کلیورلي ټینګار وکړ چې برتانیا «د خبریالانو ژوند ته ګواښ او هر هغه څوک چې په بریتانیا کې ژوند کوي نه شي زغمی.»
د سپاه پاسداران د ګواښونو زیاتوالي بریتانیا دغه اداره د خپل ملي امنیت لپاره تر ټولو لوی ګواښ ګڼي.
د لندن سنډې ټایمز ورځپاڼې د جولای په ۱۵مه (چنګاښ) په یوه راپور کې لیکلي چې د برېتانیا د کورنیو چارو وزیر سویلا برورمن په دې باور ده چې په هېواد کې د سپاه پاسداران د اغېز د نویو شواهدو په تعقیب، سپاه پاسداران ملي امنیت ته تر ټولو لوی ګواښ دی.
سنډې ټایمز لیکي چې د انګلستان له حکومته غوښتل شوي چې سپاه پاسداران د یوې بهرنۍ ترهګریزې ادارې په توګه وپيژني، خو تر اوسه د برتانیې د بهرنیو چارو وزارت له دې غوښتنې سره مخالفت کړی دی ځکه چې د لندن حکومت اندېښنه لري چې دا ډول ګام به د لندن او تهران تر منځ ډیپلوماتیکو اړیکو ته دایمي زیان واړوي.