د امریکا او هند د بهرنیو چارو وزیرانو په کاناډا کې د سېک سیاستوال د وژنې یادونه ونه کړه
که څه هم چې د کاناډا لومړي وزیر ویلي و، ډاډه دی چې د امریکا د بهرنیو چارو وزیر به له خپل هندي سیال سره د کتنې پر مهال په کاناډا کې د سېکانو د مشر د وژنې مسله راپورته کړي؛ خو د دې لیدنې په خبرپاڼه کې د دغې مسلې یادونه نهده شوې.
انټوني بلېنکن د پنجشنبې په ورځ له جې شنکر سره وکتل.
تر دې مخکې کله چې د کاناډا له لومړي وزیر جسټېن ټروډو څخه وپوښتل شول، چې ایا ښاغلی بلېنکن به په کاناډا کې د سېکانو د بېلتون غوښتونکو مشر د وژنې مسله د ښاغلي جې شنکر سره د لیدنې پر مهال راپورته کړي وویل:« امریکایان به خامخا په دې مسله د هند له حکومت سره خبرې وکړي.»
د امریکا د بهرنیو چارو وزارت په خبر پاڼه کې له جې شنکر سره د انټوني بلېنکن له کتنې وروسته د دې موضوع په اړه څه نهدي ویل شوي.
د دغط خبر پاڼې له مخې، د امریکا او هند د بهرنیو چارو وزیرانو د هند د جي۲۰ ډلې د مشرتوب، د هند ـ منځني ختیځ ـ اروپا دهلیز د جوړولو، دفاعی مسایلو، فضا او پاکې انرژۍ په اړه خبرې اترې کړې دي.
د کاناډا لومړي وزیر کابو لس ورځې وړاندې ادعا وکړه، چې د هغه هېواد "معتبر شواهد" لري چې د هند حکومت په دغه هېواد کې د جون په میاشت کې د سېکانو د بېلتون غوښتونکو مشر هارډیپ سېنګ نجار په وژنه کې لاس درلود.
د هند حکومت ښاغلی نجار چې د هندي سېکانو لپاره د خالصتان په نوم د یوې خپلواکې ځمکې د جوړولو غوښتونکی و، "ترهګر" باله.
هند د کاناډا هغه ادعاوې چې له نوي ډیلي سره یې د سېکانو د بېلتون غوښتونکي مشر له وژل کېدو سره تړاو درلود، "بې بنسټه" بللې دي.
له دې سره، د هند د بهرنیو چارو وزیر په دې وروستیو کې وویل، هېواد یې چمتو دی چې کاناډا ته په دې برخه کې هر ډول "ځانګړي او اړونده" معلومات ورکړي.
داسې برېښي، چې د کاناډا دودیزو متحدینو د اوټاوا او نوي ډیلي ترمنځ د دې کړکېچونو په اړه محتاط دریځ غوره کړی.
شنونکي باوري دي، چې واشنګټن او نور هندي لوبغاړي دې ته په سیمه کې د چین د مخ پر ودې نفوذ د مخنیوي په سترګه ګوري.
تر دې وړاندې امریکا ویلي و، د هند پر وړاندې د کاناډا پر نیوکو اندېښنه لري او په دې اړوند یې له اوټاوا سره د نوي ډیلي د همکارۍ غوښتنه کړې وه.