د پاکستان روغتیايي چارواکي وايي، نن جمعه د بلوچستان په مستونګ ولسوالۍ کې یوه جومات ته څېرمه د ځانمرګي برید له امله لږ تر لږه ۵۲ کسان مړه او تر ۶۰ ډېر ټپیان شول. له چاودنې وروسته د کوټې په روغتونونو کې بېړنی حالت اعلان شوی دی.
تراوسه کومې ډلې د دې برید مسوولیت نه دی منلی.
له دې سره د پاکستاني طالبانو د تحریک ویاند محمد خراساني ویلي، چې ټيټيپي په دې چاودنه کې لاس نه لري.
چاودنه هغه مهال رامنځته شوه، چې د الفلاح سړک مدينې جومات ته څېرمه خلک د ميلاد النبي مراسمو کې راټول شوي وو.
د پاکستان د پولیسو د سر پلټونکي مرستیال منیر احمد رویټرز ته ویلي، ځانمرګي د پولیسو د مرستیال له موټر سره نږدې برید کی دی.
د بلوچستان د اطلاعاتو سرپرست وزیر جان اڅکزی وايي، د پېښې سخت ټپیان کوټې ته وړل کېږي او د دغه ښار په روغتونونو کې بېړنی حالت اعلان شوی دی.هغه زیاتوي چې ژغورونکې ډلې مستونګ ته روانې شوې دي.
تر اوسه د دغې چاودنې څرنګوالی روښانه نه دی.
د پي ټي ای مشر عمران اسماعيل دغه چاودنه په کلکه غندلې او ويلي يې دي، هغه کسان چې بې ګناه خلک وژني ظالمان او ترهګر دي.
نوموړي هيله څرګنده کړه، چې د قانون پلې کوونکې ادارې به ډېر ژر مجرمين ونيسي.
تر دې مخکې هم په همدې ولسوالۍ کې په یوه چاودنه کې د جمعیت علمای اسلام د مشر حافظ حمدالله په ګډون لږ تر لږه ۱۱ کسان ټپیان شوي وو.
د روان کال په مۍ میاشت کې د مستونګ په سور کارېز سیمه کې هم ناپېژاندو وسلهوالو د پولیو ضد واکسین پر ټیم برید وکړ، چې په پایله کې یې یو ساتونکی ووژل شو.
د تېر کال په اکټوبر میاشت کې هم د مستونګ په قبایلي سیمه کې پر دوو موټرو د بمي چاودنې له امله درې کسان وژل شوي او شپږ نور ټپیان شوي وو.
