د ملي امنیت پخوانی مشر: امریکا له پیله د طالبانو د بشپړ له منځه وړلو اراده نه درلوده
د افغانستان د ملي امنیت پخوانی مشر عارف سروري وايي، د امریکا پوځ ۲۰۰۱ کال کې چې افغانستان ته ننوت د طالبانو د بشپړ له منځه وړلو اراده یې نه درلوده.
د افغانستان د ملي امنیت پخوانی مشر عارف سروري وايي، د امریکا پوځ ۲۰۰۱ کال کې چې افغانستان ته ننوت د طالبانو د بشپړ له منځه وړلو اراده یې نه درلوده.
نوموړي له افغانستان انټرنشنل راډيو سره په مرکه کې وويل، چې د امريکا ډيموکراټ ګوند له پاکستان سره په ګډه د طالبانو په رامنځته کېدو کې رول درلود.
هغه ادعا وکړه، چې ډیموکراټان له پیله په افغانستان کې د ډیموکراسۍ پلويان نه وو.
محمد عارف سروري چې د افغانستان د ملي امنیت پخوانی مشر و، د پخواني شوروي اتحاد پر وړاندې د جګړې او بیا د طالبانو پر وړاندې د مقاومت پر مهال د احمدشاه مسعود له باوري کسانو څخه و.
ښاغلی سروري د حامد کرزي د ولسمشرۍ په لومړۍ دوره کې هم د ملي امنیت مشر و او د دې ترڅنګ، یوه موده بیا د پنجشیر د والي په توګه هم پاتې شوی دی.
محمد عارف سروري له افغانستان انټرنشنل سره په مرکه کې ویلي، چې د طالبانو د رامنځته کېدو موخه له ترکمنستانه د افغانستان له لارې هند ته د تېلو لېږدول وو.
نوموړي وویل، چې د امریکا د بهرنیو چارو مرستیال وزیر د افغانستان د ملي مقاومت د جبهې له مشر احمد شاه مسعود سره په څو پټو ناستو کې دا موضوع مطرح کړې وه.
د افغانستان د ملي امنیت پخوانی مشر وايي، پاکستان ته د افغانستان د برخلیک د سپارلو موضوع هغه معامله وه چې د طالبانو د راڅرګندېدو په پیل کې د پاکستان او امریکا د ډیموکراټ ګوند ترمنځ شوې وه.
دغه پخواني امنیتي چارواکي زیاته کړه، چې له انتقالي ادارې وروسته ټاکل شوې وه چې د افغانستان پخوانی پاچا محمد ظاهر شاه د ولسمشر په توګه وټاکل شي؛ خو د افغانستان دوو ګاونډیو هېوادونو او امریکا له دې پرېکړې سره مخالفت وکړ.
هغه وويل، چې د حامد کرزي په مشرۍ حکومت خپل مشروعيت له لاسه ورکړ او بالاخره د طالبانو د پياوړتيا لامل شو.
د ښاغلي سروري په وینا، د امریکا او روسیې په مشرۍ د ټلوالې تر منځ بې باوري هم د طالبانو د بیا را ژوندي کېدو یو بل لامل و.
عارف سروري په دې مرکه کې ویلي، چې امریکا او بریټانیا په افغانستان کې له ترهګرۍ سره د مبارزې پر سر اختلاف درلود، چې د طالبانو د ودې لپاره یې زمینه برابره کړه.
محمد عارف سروري چې یو له استخباراتي شخصیتونو څخه و او د مقاومت په لومړۍ دوره کې یې د احمدشاه مسعود ملاتړ کاوه، د افغانستان د پخواني ولسمشر ډاکټر نجیب الله د اعدام او د طالبانو لهخوا د کابل د نیولو د ۲۷م تلین په مناسبت په یوه مرکه کې وویل، چې هند له دې پېښې دوه یا درې اونۍ مخکې دا چانس درلود چې ډاکټر نجیب الله له کابله وباسي؛ خو دا کار یې ونکړ.
د ښاغلي سروري په وینا، ډاکټر نجیب د طالبانو لهخوا د کابل د سقوط په درشل کې پنجشیر ته د تلو په اړه د احمدشاه مسعود غوښتنه رد کړه، که نه نو نوموړي فرصت درلود چې له هغه ځایه به تاجکستان او بیا هر هغه هېواد ته چې د ده خوښه وه، د پناه اخیستو غوښتنه کړې وای.
