د افغانستان انټرنشنل - پښتو خبریال
افغانستان انټرنشنل-پښتو ته د یوې باوري سرچینې د رالېږل شویو اسنادو پر بنسټ، د طالبانو د عامې روغتیا وزارت یوه لوړپوړي چارواکي له یوه بل طالب سره په ګډه د تمویلېدونکو روغتیايي قراردادونو د ترلاسهکېدو په موخه د «خیرالبشر» په نوم یوه شخصي موسسه جوړه کړې ده.
سرچینې د چهارشنبې په ورځ (د غويي ۱۷مه) زیاته کړه، چې د محمد داوود منصوري په نوم د طالب چارواکي اړوند دغه موسسه د باختر انکشافي شبکې (BDN) له لارې تمویلېږي او له قراردادونو څخه خپله ونډه اخلي.
د سرچینې د معلوماتو لهمخې، نوموړی طالب چارواکی د طالبانو د عامې روغتیا وزارت د نړۍوالو اړیکو رییس دی. د مفتي مطیعالله په نوم یو بل طالب چارواکی هم په دې موسسه کې شریک دی.
سرچینه وایي، چې د باختر انکشافي شبکې یا BDN له یونېسف ادارې څخه په یو شمېر روغتیايي برخو کې قراردادونه ترلاسه کړي، خو ۲۵ سلنه برخه یې د طالبانو «خیرالبشر» موسسې ته ورکړې ده.
یاده موسسه دا مهال د میدانوردګ ولایت په جغتو او سېداباد ولسوالیو کې فعالیت کوي.
د سرچینې په وینا، تر هغې وروسته چې په افغانستان کې د سویډن هېواد اړوند موسسې (SCA) فعالیتونه بند شول او باختر انکشافي شبکې (BDN) یې ځای ونیوه، د کاري پرسونل تنخاوې ۲۰ سلنه کمې شوي دي.
همداراز، هغو کارکوونکو ته چې پخوا به یې ۱۰۰ سلنه «حقالخطر» اخیسته، اوس د باختر انکشافي شبکه (BDN) یوازې ۷۰ سلنه «حقالخطر» ورکوي او «خیرالبشر» موسسې بیا دغه امتیاز ان ۴۰ سلنې ته ټيټ کړی دی.
سرچینې همداراز ویلي، چې د طالبانو د عامې روغتیا وزارت د طالب چارواکي محمد داوود منصوري اړوند «خیرالبشر» موسسه د خپلو کارکوونکو تنخاوې پر وخت نهورکوي او په میاشتو-میاشتو یې ځنډوي.
د سرچینو د معلوماتو پر بنسټ، یاد طالب چارواکی په پنجشېر ولایت کې هم د Move موسسې د روغتیا بېړني غبرګون (Health Emergency Response) له پروژه څخه ۲۵ سلنه ونډه اخلي او په وینا یې دا پروژه د یونېسف له خوا تمویلېږي.
د بهرنیو لهخوا په تمویلېدونکو پروژو کې د طالبانو د لاسوهنو، باجاخیستنو او ونډو د نړۍوالو بنسټونو د مرستو په تړاو د شفافیت، حسابورکونې او د کارکوونکو د حقونو جدي پوښتنې راولاړې کړې دي.
دا په داسې حال کې ده، چې پر افغانستان د طالبانو له واکمنېدو وروسته د دغې ډلې د لاسوهنې او باجاخیستنې له امله په هېواد کې ګڼو بهرنیو بنسټونو خپلې پروژې او فعالیتونه په ټپه درولي دي.
