د پاکستان د امنیتي ځواکونو مرګ ژوبله په تېرو اتو کلونو کې تر ټولو لوړې کچې ته رسېدلې
د پاکستان د امنیتي څېړنو او مطالعاتو مرکز په یوه راپور کې لیکلي، چې له وسله والو سره په جګړه کې د دغه هېواد د امنیتي ځواکونو مرګ ژوبله په تېرو اتو کلونو کې تر ټولو لوړې کچې ته رسېدلې ده.
د دغه مرکز د شمېرو له مخې؛ په تېرو ۹ میاشتو کې د پاکستان د امنیتي ځواکونو ۳۸۶ غړي وژل شوي دي.
ویل کیږي، چې په دغو کې ۱۳۷ تنه د اردو سرتیري دي.
عرب خبري شبکه، د یکشنبې په ورځ (د میزان ۹ مه) لیکلي، چې په ۱۴۰۰ کال کې په کابل کې د طالبانو د واکمنۍ له بېرته راګرځېدو وروسته په پاکستان کې په خاصه توګه په خېبر پښتونخوا او بلوچستان ایالاتونو کې د سخت دریځو بریدونو زیاتوالی موندلی دی.
په راپور کې راغلي، چې کارپوهان په پاکستان کې د وسله والو بریدونو او د امنیتي ځواکونو د تلفاتو د زیاتوالي لامل په افغانستان کې د طالبانو د بیاځلي واک ته رسېدو لامل بولي.
د دې کارپوهانو په وینا؛ د طالبانو بېرته راستنېدو له امله په خېبر پښتونخوا کې اورپکو ډلو خپلو بریدونو ته زور ورکړی او په بلوچستان کې د بیلتون غوښتونکو ډلو تاوتریخوالی زیات کړی دی.
د پاکستان د څېړنو او امنیتي مطالعاتو په مرکز (CASS) کې د ستراتیژیک دفاع او امنیت رییس محمد علي عرب نیوز ته وویل، چې په پاکستان کې د تروریستي پېښو د زیاتوالي یو له اصلي لاملونو څخه د طالبانو بې کفایتي ده، چې نه شي کولی خپل مکلفیتونه د نړۍوال امنیت په ځانکړي توګه د پاکستان پر وړاندې پلي کړي.
په افغانستان کې د پاکستان پخوانی سفیر رستم شاه مهمند وايي، د وروستیو بریدونو زیاتوالی په پاکستان کې د دغو دوو ډلو د تحریک طالبان پاکستان او داعش د نفوذ د پراخولي "وروستی هڅه" ده.
ښاغلي مهمند وویل، افغان طالبان له دغو پرمختګونو ښه خبر دي، خو دا ډله له ټولو وسله والو ډلو سره د مقابلې وړتیا نه لري.
هغه وویل؛ که څه هم طالبان پر افغانستان کنټرول لري، خو منظم اردو او پولیسو ځواک نه لري.
خو دغه پخواني ډېپلوماټ ټینګار کړی، چې پاکستان باید له افغان طالبانو سره په همکارۍ د ترهګرو ډلو پر وړاندې همغږي اقدامات وکړي.
هغه وړانديز وکړ، چې پاکستان دې له افغان طالبانو سره همکاري وکړي او په هر ولايت کې دې يوه کميټه جوړه کړي چې د څارنې، همغږۍ او د معلوماتو د تبادلې په برخه کې اسانتياوې رامنځته کړي.