د افغان کډوالو د اجباري راستنېدو په درشل کې طالبانو په ننګرهار کې بېړنۍ غونډه وکړه
د پاکستان له لوري د افغان کډوالو د ویستلو له پرېکړې وروسته د طالبانو د کډوالو چارو وزارت په ننګرهار کې له کډوالو سره د مرستې په موخه بېړنۍ ناسته وکړه.
د پاکستان له لوري د افغان کډوالو د ویستلو له پرېکړې وروسته د طالبانو د کډوالو چارو وزارت په ننګرهار کې له کډوالو سره د مرستې په موخه بېړنۍ ناسته وکړه.
په دې کتنه کې په ننګرهار کې د طالبانو د کډوالو چارو رييس باز محمد عبدالرحمان له خيريه موسسو وغوښتل، چې له کډوالو سره مرسته وکړي.
د طالبانو د کډوالو چارو وزارت په یوه خبرپاڼه کې لیکلي، چې دغه غونډه د چهارشنبې په ورځ (د تلې په ۱۲مه) په جلال اباد ښار کې جوړه شوې وه.
د پاکستان موقت حکومت په دغه هېواد کې په غیر قانوني توګه مېشتو بهرنیو اتباعو ته یوه میاشت وخت ورکړی، چې له پاکستانه ووځي.
پاکستاني چارواکو ویلي دي، چې که بهرني اتباع د اکټوبر تر پایه له قانوني اسنادو پرته له دغه هېواده ونه وځي نو په زور به وشړل شي.
له بلې خوا په اسلام اباد کې د طالبانو سفارت د سې شنبې په ورځ (د تلې۱۱مه) وویل، چې پاکستاني پولیسو په تېرو دوو اونیو کې د ښځو او ماشومانو په ګډون تر زرو زیات افغان مهاجرین نیولي دي.
دغه سفارت ویلي، چې نیمايي بندیانو قانوني اسناد درلودل.
په ورته وخت کې د طالبانو ویاند له پاکستانه غوښتي، چې د افغان کډوالو د ویستلو پر پرېکړې له سره غور وکړي.
