په ملګرو ملتونو کې د افغانستان استازیتوب ته د طالبانو نوماند د اسلامي هېوادونو په ګډون له ټولو هېوادونو وغوښتل چې له پاکستانه د اېستل شویو لسګونه زرو کډوالو سره مرسته وکړي.
سهیل شاهین د ترکیې اناتولي خبري اژانس ته ویلي، چې په تېره یوه اوونۍ کې له پاکستانه څه باندې درې لکه افغان کډوال افغانستان ته ستانه شوي دي.
د شاهین دغه څرګندونې چې د چهارشنبې په ورځ اناتولي ورځپاڼې خپرې کړې، ویلي یې دي چې اېستل شوي افغانان سرپناه، خوړو، د څښاک اوبو او ګرمو جامو ته اړتیا لري.
د بې اسنادو کډوالو د داوطلبانه وتلو لپاره د ضرب الاجل تر پای ته رسېدو مخکې طالبانو ویلي و چې، دوی به له پاکستانه شړل شویو کډوالو سره تر خپله وسه مرسته وکړي.
رسنیو د طالبانو په حواله خبر ورکړی، چې دغې ډلې په ظاهرآ له دغو کډوالو سره د مرستې لپاره شاوخوا دوه میلیارډه افغانۍ ځانګړې کړې دي.
په قطر کې د طالبانو د سیاسي دفتر استازي زیاته کړه چې، په پاکستان کې د کډوالو شتمني او جایدادونه یرغمل شوي او د دغه هیواد د پولیسو او امنیتي ځواکونو له خوا ځورول کیږي.
شاهین وویل، چې دغه کسان اوس په افغانستان کې دي او نړیواله ټولنه دې ورسره مرسته وکړي.
طالبانو او ملګرو ملتونو له پاکستانه غوښتي چې له دغه هېواده دې د افغانانو د اېستلو بهیر ودروي.
طالبانو د اېستل شویو کډوالو د څپو د مدیریت له پاره ۱۲ کمیټې جوړې کړې دي او سهیل شاهین د دغې ډلې د رسنیو د کمیټې غړی دی چې د شړل شویو کډوالو وضعیت وڅاري.
طالبانو د تورخم او سپین بولدګ په پولو کې د کډوالو د هرکلي له پاره خیمې درولې دي.
متحده عربي اماراتو د کډوالو له پاره شاوخوا د شلو زرو خیمو مرسته کړې ده.
سهیل شاهین وویل، طالبان د کډوالو له دغه وضعیت سره د مقابلې له پاره د نړیوالې ټولنې او اسلامي هېوادونو همکارۍ ته اړتیا لري.
