یو ایرانی چارواکی وایي چې، د طالبانو د رییس الوزراء له مرستیال سره د ایران د چاپېریال ساتنې د ادارې د مشر په لیدنه کې د هلمند د اوبو په اړه شفاهي هوکړه شوې ده. نوموړي ویلي، ملا برادر ژمنه کړې چې د شرایطو په برابرېدو سره به حقابه ورکړل شي.
د طالبانو د رییس الوزراء اقتصادي مرستيال ملا عبدالغني برادر د لړم په ١٣مه تهران ته ولاړ او د لړم په ١٩مه بېرته کابل ته راستون شو.
نوموړي د یوې اوونۍ په اوږدو کې د ایران د چاپېریال ساتنې د ادارې د مشر په ګډون د اسلامي جمهوریت له بېلابېلو چارواکو سره وکتل.
د ایران د خبري اژانس (اېلنا) د راپور له مخې، د ایران د چاپېریال ساتنې د ادارې سلاکار علي محمد طهماسبي وویل، موږ له طالبانو هیله لرو چې د ښه ګاونډیتوب او د ګاونډیتوب د پیاوړتیا د اصولو پر بنسټ د حقابې په خوشې کولو کې پاتې رانه شي.
له دې سره ښاغلي طهماسبي د ایران د حقابې د کچې په اړه د نظر د اختلاف خبر هم ورکړ.
هغه وویل، چې د ایران او طالبانو تر منځ د حقابې په اړه د نظر اختلاف د ۸۲۰ مېلیون متر مکعبه د ځانکړې شوې اندازې په اړه دی.
دغه ایراني چارواکي په ۱۳۵۱ کال کې د ایران او افغانستان تړون ته اشاره وکړه او ویې ویل چې، موږ پر طالبانو ټینګار کړی چې د کارپوهانو د ګډې کاري ډلې په جوړولو سره خپل اختلافات له منځه یوسو.
