د ناروې پارلمان له حکومته وغوښتل، چې د فلسطیني دولت د په رسمیت پېژندلو لپاره چمتو شي
د ناروې د پارلمان استازو د پنجشنبې په ورځ د یوه پرېکړه لیک په صادرولو سره د خپل هېواد له حکومته وغوښتل، چې د فلسطین د خپلواک دولت د په رسمیت پېژندلو لپاره تابیاوې ونیسي.
ځینو کوچنیو ګوندونو د فلسطین دولت د سمدستي په رسمیت پېژندلو غوښتنه هم وکړه.
د فرانس پرېس خبري اژانس د خبر له مخې، په دغه پرېکړه لیک کې چې د رایو په اکثریت تصویب شو راغلي دي:« له حکومته غوښتل کېږي، چې دا کار هغه مهال وکړي چې د فلسطیني دولت په رسمیت پېژندل د سولې پر بهیر مثبت اغېز ولري او دا پېژندنه د اسراییل او فلسطین ترمنځ د سولې د وروستۍ معاهدې په شرط ونه کړي.»
تر دې مخکې ایسلنډ، سویډن، پولنډ، چک جمهوریت او رومانیا د فلسطین دولت په رسمیت پېژندلی دی.
د اسپانیې لومړي وزیر پډرو سانچز هم د پنجشنبې په ورځ پارلمان ته وویل، چې د اسپانیې او ټولو اروپایي هېوادونو لهخوا د فلسطیني دولت په رسمیت پېژندلو لپاره به کار وکړي.
د اروپایانو دغه هڅې د دې ښکارندویي کوي، چې د غزې جګړې یو ځل بیا د فلسطیني دولت د جوړېدو او د اسراییل لهخوا د فلسطیني سیمو د اشغال د پای ته رسولو موضوع په جدي توګه د پام وړ ګرځولې ده.
