د فاریاب ولایت کې په نشه روږدي کس ځان او د خپلې کورنۍ غړو ته اور اچولی
ځایي سرچینو ویلي، چې دا پېښه د دغه ولایت د دولت اباد ولسوالۍ په محمود خېلو سیمه کې شوې ده. په پېښه کې د دغه روږدي کس یو کوچنی ماشوم مړ شوی، او د هغه په ګډون د کورنۍ اووه تنه غړي یې سخت سوځیدلي چې د ځینو حالت یې د اندېښنې وړ ښودل شوی.
تر دې مهاله ځايي چارواکو په دې اړه څه نه دي ویلي.
د طالبانو له بیا واکمنیدو وروسته په افغانستان کې د وزګارتیا له امله خلک له سخت اقتصادي ستونزو سره لاس او ګریوان دي، چې تر ډېره د دغسې پېښو تر شا د کورنیو اقتصادي ستونزې یادیږي.
تر دې وړاندې هم د افغانستان په بیلابیلو ولایتونو کې یو شمېر کسانو د اقتصادي ستونزو له امله ځانوژنې کړې دي.
