روسي رسنۍ: ولادیمیر پوتین به د جي شل په مجازي غونډه کې برخه واخلي
روسي رسنیو د یکشنبې په ورځ د (لړم په ۲۸مه نیټه) د جي شل په مجازي غونډه کې د دغه هیواد د ولسمشر ولادیمیر پوتین د برخې اخیستو خبر ورکړ. دغه غونډه چې ټاکل شوې د روانې اونۍ د چهار شنبې په ورځ ترسره شي، د روسیې ولسمشر ولادیمیر پوتین به هم پکې برخه واخلي.
پوتین په دغه غونډه کې په داسې حال کې برخه اخلي چې، مخکې د سپټمبر په میاشت کې په هند کې د جي شل په کلنۍ حضوري ناسته کې یې برخه نه وه اخیستې.
هند چې اوس مهال د جي شل ګروپ مشري کوي، د دغه هیواد لومړي وزیر نریندرا مودي تر دې مخکې ویلي و چې پوتین د ۲۰۲۲ کال په فبرورۍ کې پر اوکراین د خپل ناقانونه یرغل له پیل سره د جي شل په کلنۍ غونډه کې ګډون نه و کړی.
د جي شل سرمشريزه غونډه چې د سپټمبر پر نهمه نېټه په ډیلي کې شوې وه، پکې د اقلیم پر بدلون، په نړۍ کې د خوراکي توکو په خوندیتوب او بېوزله هېوادونو ته د پور د تنظیم پر مسلو خبرې وشوې .
د دې ترڅنګ، په دغه سرمشریزه کې د هند لومړي وزیر نریندرا مودي په ټولې نړۍ غږ وکړ چې د بې باورۍ فضا د ټولو له پاره د باور پر یوه فضا بدله کړي.
امريکا او اروپايي شورا د نرېندرا مودي له دې وړانديز څخه ملاتړ وکړ.
د یادولو وړ ده چې، د روسيې ولسمشر ولادمير پوتين او د چين ولسمشر شي جېنپېنګ د جي شل په غونډه کې ګډون نه درلود او د دوی پر ځای يې وزيران سر مشريزې ته ورغلي وو.
