پاکستانۍ رسنۍ: په وزیرستان کې د اتمانزو جرګې پر پولیو ضد کمپاین بندیز ولګاوه
د خېبرپښتونخوا په قبايلي سيمه شمالي وزيرستان کې يوې ځايي جرګې په هغو کورنیو چې خپلو ماشومانو ته د پوليو ضد څاڅکو ورکولو اجازه ورکوي د پنځه لکه کلدارو جریمه اعلان کړه.
د خېبرپښتونخوا په قبايلي سيمه شمالي وزيرستان کې يوې ځايي جرګې په هغو کورنیو چې خپلو ماشومانو ته د پوليو ضد څاڅکو ورکولو اجازه ورکوي د پنځه لکه کلدارو جریمه اعلان کړه.
د جرګې وياند مفتي بيت الله د واکسيناسيون پر کمپاين د بشپړ بنديز اعلان وکړ او سرغړوونکو ته يې درنه جريمه وټاکله.
د حالاتو د خرابوالي له امله جرګې د بنو ـ ميرانشاه لویه لار د هر ډول ګاډو پر مخ تړلې ده.
دوی په ۳۰ مادو کې د خپلو غوښتنو نوملړ وړاندې کړ، چې په کې په ولسوالیو کې د امنیت د ټینګښت، د طبیعي زېرمو د عادلانه وېش او د ورکو شویو کسانو د راستنېدو په ګډون یو شمېر مسایل شامل دي.
ورته مهال په شمالي وزيرستان کې د پاکستان تحريک انصاف (پي ټي ای) مشر قدير داوړ له صوبايي حکومته غوښتي، چې د واکسيناسيون د کمپاين د دوام د ډاډ لپاره دې د اتمانزو جرګې غوښتنې پوره کړي.
نوموړي د جرګې پر هغې پرېکړې هم نيوکه وکړه، چې د واکسيناسيون د کمپاين د بندېدو په اړه يې کړې وه او ټينګار يې وکړ، چې دا ډول تکتيکونه د ستونزو د هواري پر ځاى ستونزې نورې هم زياتوي.
د اتمانزو جرګه له تېرو څلورو مياشتو راهيسې په سيمه کې د بې امنۍ پر ضد لاريون کوي او له حکومت او امنيتي ځواکونو څخه د امن او امان د وضعيت د ښه کېدو لپاره د پرېکنده اقدام غوښتنه کوي.
